കമലാ സുരയ്യയായി വേഷമിടുന്നു ; മഞ്ജുവാര്യർക്ക് നേരെ സോഷ്യല്‍ മീഡിയയില്‍ ആക്രമണം
കൊച്ചി : മലയാളത്തിന്റെ പ്രിയ എഴുത്തുകാരി കമലാ സുരയ്യയായി വേഷമിടുന്നു എന്ന വാര്‍ത്ത പുറത്തുവന്നത് മുതല്‍ നടി മഞ്ജുവാര്യർക്ക് നേരെ സോഷ്യല്‍ മീഡിയയില്‍ വ്യാപകമായ ആക്രമണം. കമല സുരയ്യയുടെ ജീവിതകഥ ആസ്പദമാക്കി കമൽ സംവിധാനം ചെയ്യുന്ന ചിത്രത്തിൽ നായികയാവുന്നതിനെ എതിർത്താണ് ചിലർ ഫേസ്ബുക്കിൽ രംഗത്തെത്തിയത്. മഞ്ജു പ്രധാന കഥാപാത്രമായെത്തുന ‘കെയർ ഒാഫ് സൈറ ബാനു’ എന്ന ചിത്രത്തിലെ തട്ടമിട്ടുകൊണ്ടുള്ള ചിത്രം മഞ്ജു ഫേസ്ബുക്ക് പ്രൊഫൈൽ പിക്ചർ ആക്കിയിരുന്നു. ഇതിന് താഴെയാണ് മഞ്ജുവിനെ അവഹേളിക്കുന്ന ഭാഷയിൽ കമൻറുകൾ പ്രവഹിക്കുന്നത്. രാജ്യത്തോടുള്ള വെല്ലുവിളിയാണ് മഞ്ജുവിെൻറ തീരുമാനം എന്നാണ് ചിലരുടെ കമൻറ്. വിദ്യബാലൻ സ്ക്രിപ്റ്റ് വായിച്ച് ഗൂഢലക്ഷ്യം മനസിലാക്കി ഒഴിവാക്കിയ സിനിമ മഞ്ജു ഏറ്റെടുത്തത് ശരിയായില്ലെന്നാണ് മറ്റു ചില കമൻറ്. പിറന്ന സമുദായത്തെ ഉപേക്ഷിച്ച് മാധവിക്കുട്ടിക്ക് ഉണ്ടായ അനുഭവം മഞ്ജുവിന് ഉണ്ടാവരുതെന്ന പ്രാർഥനകളും കമൻറുകളുടെ കൂട്ടത്തിലുണ്ട്. അസിഹിഷ്ണുതയുമായി ബന്ധപ്പെട്ട പ്രശ്നങ്ങളിൽ സംവിധായകൻ കമലിന് പിന്തുണ അറിയിച്ചതിനുള്ള ഉപകാര സ്മരണയായാണ് മഞ്ജുവിന് ആമിയുടെ വേഷം ലഭിച്ചെന്നാണ് ചിലരുടെ കണ്ടെത്തൽ. ചിത്രത്തിൽ ആദ്യം നായികയായി നിശ്ചയിച്ചിരുന്നത് ബോളിവുഡ് നടി വിദ്യാബാലനെയായിരുന്നു. എന്നാൽ, സിനിമയുടെ ചിത്രീകരണം തുടങ്ങാൻ അഞ്ച് ദിവസം മാത്രം ശേഷിക്കെ വിദ്യാബാലൻ സിനിമയിൽ നിന്ന് പിൻമാറുകയായിരുന്നു. തുടര്‍ന്ന്‍ പല നടിമാരുടെ പേരുകള്‍ പറഞ്ഞു കേട്ടെങ്കിലും അവസാനം മഞ്ജുവാര്യര്‍ക്ക് നറുക്ക് വീഴുകയായിരുന്നു.അതേസമയം ആക്രമണം രൂക്ഷമായപ്പോള്‍ തന്റെ അഭിപ്രായം വെള്ളിപ്പെടുത്തി മഞ്ജു രംഗത്ത് വന്നു.തന്റെ ഫേസ്ബുക്ക് പേജിലൂടെയാണ് കുറ്റപ്പെടുത്തിയവര്‍ക്കുള്ള മറുപടി മഞ്ജു നല്‍കിയിരിക്കുന്നത്.
