അടിപതറി ആം ആദ്മി ; ഗോവയിലും പഞ്ചാബിലും കനത്ത തോല്‍വി
ന്യൂഡൽഹി : രാജ്യതലസ്ഥാനം കയ്യില്‍ ഉണ്ടെങ്കിലും മറ്റുള്ള സംസ്ഥാനങ്ങളിലും സാന്നിധ്യം അറിയിക്കാം എന്ന ആം ആദ്മി പാര്‍ട്ടിയുടെ മോഹങ്ങള്‍ക്ക് കരിനിഴല്‍ വീഴ്തുന്നതായി പുറത്തു വന്ന തിരഞ്ഞെടുപ്പ് ഫലം. ഡൽഹിക്ക് ശേഷം പഞ്ചാബും ഗോവയും പിടിച്ചടക്കി ദേശീയ രാഷ്ട്രീയത്തിലേക്ക് വളരാമെന്ന ആംആദ്മി പാർട്ടിയുടെ മോഹങ്ങൾക്കാണ് തിരിച്ചടി നേരിട്ടത്. പഞ്ചാബിൽ ബി.ജെ.പിെയ പിറകിലാക്കി 117ൽ 23 സീറ്റുകൾ നേടി കോൺഗ്രസിന് പിന്നിൽ രണ്ടാം സ്ഥാനം നേടിയെങ്കിലും മുഖ്യമന്ത്രി സ്ഥാനാർഥി ഭഗ്വന്ത്മാൻ ജലാലാബാദിൽ പരാജയപ്പെട്ടത് കനത്ത തിരിച്ചടിയായി. 117 സീറ്റുകളിലേക്കും സ്ഥാനാർഥികളെ നിർത്തി തെരഞ്ഞെടുപ്പ്തിയതി പ്രഖ്യാപിക്കും മുമ്പ് പ്രചാരണം തുടങ്ങിയ ആം ആദ്മിയുടെ ആത്മ വിശ്വാസത്തിനേറ്റ പ്രഹരമായിരിക്കുകയാണ് പരാജയം. അതുപോലെ ഗോവയിൽ 40 ൽ 39 സീറ്റുകളിലേക്കും സ്ഥാനാർഥികളെ നിർത്തിയിട്ടും ഒരു സീറ്റിൽ പോലും വിജയിക്കാനാകാത്തതും പാർട്ടിയുടെ പരിതാപകരമായ അവസ്ഥ തുറന്നു കാണിക്കുന്നു.
