നോട്ടുനിരോധനത്തിനെ എതിര്‍ക്കുന്നവര്‍ക്കുള്ള മറുപടിയാണ് ബിജെപിയുടെ വിജയം എന്ന് സുരേഷ്ഗോപി
കോഴിക്കോട് : നോട്ട് അസാധുവാക്കലിനെ എതിർത്തവർക്കുള്ള മറുപടിയാണ് ബി.ജെ.പിയുടെ തെരഞ്ഞെടുപ്പ് വിജയം എന്ന് നടനും രാജ്യസഭാംഗവുമായ സുരേഷ് ഗോപി. നോട്ട് അസാധുവാക്കലിനെ എതിര്‍ത്ത കേരളത്തിലെ മോശപ്പെട്ട രാഷ്ട്രീയത്തിനെതിരെയുളള വിജയമാണ് ഉത്തര്‍പ്രദേശ് അടക്കമുളള സംസ്ഥാനങ്ങളില്‍ കണ്ടത്. കേരളത്തിലെ ജനങ്ങളല്ല, മറിച്ച് മോശപ്പെട്ട രാഷ്ട്രീയമാണ് നോട്ട് അസാധുവാക്കലിനെ വിമര്‍ശിച്ചതെന്നും അദ്ദേഹം കൂട്ടിച്ചേർത്തു. നേരത്തെ നോട്ട് നിരോധനം പ്രഖ്യാപിച്ച സമയത്ത് പിന്തുണയുമായി സുരേഷ് ഗോപി രംഗത്ത് വരുകയും പണം മാറ്റി വാങ്ങുന്നതിനായി ജനങ്ങള്‍ കൂട്ടത്തോടെ ബാങ്കുകളിലേക്ക് പോകേണ്ട ആവശ്യമില്ലെന്നും അതിനായി ഇനിയും സമയമുണ്ടെന്നും പറഞ്ഞിരുന്നു. അതേസമയം യു.പിയിലും ഉത്തരാഖണ്ഡിലും ബി.ജെ.പി വിജയിച്ചത് നോട്ട് നിരോധനം നടപ്പാക്കിയതുകൊണ്ടല്ലെന്ന് ശിവസേന. പാര്‍ട്ടി മുഖപത്രമായ സാംനയില്‍ പ്രസിദ്ധീകരിച്ച മുഖപ്രസംഗത്തിലാണ് ഈ പരാമര്‍ശമുള്ളത്. കര്‍ഷകരുടെ വായ്പ എഴുതിത്തള്ളുമെന്ന വാഗ്ദാനമാണ് ബി.ജെ.പിയെ വിജയത്തിലേക്ക് നയിച്ചതെന്നും ശിവസേന ചൂണ്ടിക്കാട്ടി.
