ജിയോയെ നേരിടാന്‍ ഐഡിയയും വൊഡാഫോണും ഒന്നായി ; ഇനി രാജ്യത്തെ ടെലികോം രംഗത്തെ ഏറ്റവും വമ്പൻ കമ്പനി
രാജ്യത്തെ മുൻനിര ടെലികോം സേവനദാതാക്കളായ ഐഡിയയും വോഡഫോണും ലയിച്ചു. ജിയോയുടെ വെല്ലുവളി നേരിടാനാണ് ഇരുകമ്പനികളും കൈകോര്‍ക്കുന്നത്. 45 ശതമാനം ഒാഹരികളാവും പുതിയ കമ്പനിയിൽ വോഡഫോണിന് ഉണ്ടാവുക. മൂന്ന് ഡയറക്ടർമാരെ നോമിനേറ്റ് ചെയ്യാനുള്ള അവകാശവും വോഡഫോണിന് ഉണ്ടാവും. ഇതോടെ രാജ്യത്തെ മൂന്നിലൊന്ന് ഉപഭോക്താക്കള്‍ പുതിയ കൂട്ടുകെട്ടിന് കീഴിലാകും. അതായത് 40 കോടിയോളം ഉപഭോക്താക്കള്‍ ഇവരുടെ വരിക്കാരാകും. കമ്പനിയുടെ ചെയർമാനെ നിയമിക്കാനുള്ള അവകാശം ഐഡിയയ്ക്കായിരിക്കും. സി.ഇ.ഒ, ചീഫ് ഒാപ്പറേറ്റിങ് ഒാഫീസർ തുടങ്ങിയ നിയമനങ്ങൾ രണ്ട് കമ്പനികളും ചേർന്ന് നടത്തും. ജിയോയുടെ വരവോടെ ഇന്ത്യയിലെ മറ്റ് മൊബൈൽ സേവനദാതാക്കൾ കടുത്ത പ്രതിസന്ധി നേരിട്ടതോടെയാണ് ലയന തീരുമാനത്തിലേക്ക് െഎഡിയയും വോഡഫോണും എത്തിയതെന്നാണ് സൂചന. ജിയോയുടെ വരവോടെ നാല് വർഷത്തിനിടയിലെ ഏറ്റവും കുറഞ്ഞ ലാഭത്തിലേക്ക് എയർടെൽ കൂപ്പുകുത്തി. ഐഡിയയുടെ ലാഭത്തിലും കുറവുണ്ടായി. ഇതാണ് പുതിയ തന്ത്രങ്ങൾ ആവിഷ്കരിക്കാൻ മൊബൈൽ സേവനദാതാക്കളെ പ്രേരിപ്പിച്ചത്.
