എന്തും വിളിച്ചു പറയുന്നവരുടെ സ്ഥാനം ചരിത്രത്തിന്റെ ചവറ്റു കൊട്ടയില്‍: പന്ന്യന്‍
തിരുവനന്തപുരം: ദേവികുളം സബ്കളക്ടര്‍ക്കെതിരെ മന്ത്രി എം.എം. മണി നടത്തിയ പരമാര്‍ശത്തെ വിമര്‍ശിച്ച് സിപിഐ നേതാവ് പന്ന്യന്‍ രവീന്ദ്രന്‍. വാര്‍ത്തയ്ക്ക് വേണ്ടി എന്തും വിളിച്ചു പറയുന്നവര്‍ ഇരിക്കുന്ന കസേരയുടെ വില നോക്കണം. ചരിത്രത്തിന്റെ ചവറ്റുകൊട്ടയിലായിരിക്കും ഇത്തരക്കാരുടെ സ്ഥാനമെന്നും പന്ന്യന്‍ പറഞ്ഞു. വിവരക്കേട് പറയാന്‍ മടിയില്ലാത്തവര്‍ നാട്ടിലുണ്ട്, ഇത്തരക്കാര്‍ക്ക് മറുപടിയില്ലെന്നും പന്ന്യന്‍ രവീന്ദ്രന്‍ കൂട്ടിച്ചേര്‍ത്തു.
മാന്യത, അതാണ് മലയാളികളുടെ ഏറ്റവും വലിയ സൗന്ദര്യമെന്നും മാന്യത കൈവിട്ട് ആര് കളിച്ചാലും ചരിത്രത്തില്‍ അവരുടെ സ്ഥാനം ചവറ്റുകുട്ടയില്‍ തന്നെയാവുമെന്നും പന്ന്യന്‍ രവീന്ദ്രന്‍ ആവര്‍ത്തിച്ചു.
ശനിയാഴ്ച കുഞ്ചിത്തണ്ണി ഇരുപതേക്കറിലെ യോഗത്തില്‍ സംസാരിക്കവെ ശ്രീറാമിനെ ഊളമ്പാറയ്ക്കു വിടണമെന്നു മണി ആവശ്യപ്പെട്ടിരുന്നു. ദേവികുളം സബ് കലക്ടര്‍ ജനവിരുദ്ധനും തന്നിഷ്ട പ്രകാരം പ്രവര്‍ത്തിക്കുന്നയാളുമാണ്. മൂന്നാര്‍ ഉള്‍പ്പടെയുള്ള സ്ഥലങ്ങളില്‍ ഭൂമി കയ്യേറ്റം ഒഴിപ്പിക്കുന്നതുമായി ബന്ധപ്പെട്ട സബ് കലക്ടറുടെ നടപടികളുടെ പശ്ചാത്തലത്തിലാണ് രൂക്ഷവിമര്‍ശനവുമായി മന്ത്രി രംഗത്തെത്തിയത്.
