അവരെ രോഗികളാക്കാന്‍ ഇതുമതി, വെറുതെ വിടൂ… എന്ന് ഹൈക്കോടതി
ഡല്‍ഹി:ബില്‍ അടയ്ക്കാത്തതിന്റെ പേരില്‍ ചികിത്സ കഴിഞ്ഞ് രോഗികളെ തടഞ്ഞുവെക്കാന്‍ ആശുപത്രിക്ക് അധികാരമില്ലെന്ന് ഡല്‍ഹി ഹൈക്കോടതിയുടെ സുപ്രധാന വിധി. മുന്‍ മധ്യപ്രദേശ് പൊലീസുകാരനായ അച്ഛനെ ബില്‍ കുടിശ്ശിക അടയ്ക്കാത്തതിന്റെ പേരില്‍ സിര്‍ ഗംഗാ റാം ആശുപത്രി തടഞ്ഞുവെച്ചിരിക്കുകയാണെന്ന് ചൂണ്ടിക്കാട്ടി മകന്‍ നല്‍കിയ ഹേബിയസ് കോര്‍പസ് ഹര്‍ജിയിലാണ് കോടതിയുടെ നിരീക്ഷണം.
രോഗികളെ തടഞ്ഞുവെയ്ക്കുന്ന ആശുപത്രി അധികൃതരുടെ നടപടിയെ കോടതി അപലപിച്ചു, ബില്‍ അടച്ചില്ലെങ്കിലും രോഗിയെ പറഞ്ഞയക്കണമെന്ന് കോടതി ഉത്തരവിട്ടു. രോഗിയുടെ ഡിസ്ചാര്‍ജ് സമ്മറി എത്രയും വേഗത്തില്‍ തയ്യാറാക്കി മകനൊപ്പം പറഞ്ഞയക്കാന്‍ ആവശ്യമായ നടപടികള്‍ ഉടനടി എടുക്കണമെന്നും കോടതി ആശുപത്രിയോട് ആവശ്യപ്പെട്ടു.
ഉദര സംബന്ധമായ അസുഖത്താല്‍ മുന്‍ പൊലീസ് ഉദ്യോഗസ്ഥനെ ഫെബ്രുവരിയിലാണ് ആശുപത്രിയില്‍ പ്രവേശിപ്പിച്ചത്. 13.45 ലക്ഷം രൂപയാണ് ആശുപത്രി നല്‍കിയ ചികിത്സാ ബില്‍.