സംസ്ഥാനത്തെ തടവുകാര്‍ക്ക് അവയവദാനത്തിന് സൗകര്യമൊരുക്കും
തിരുവനന്തപുരം: സംസ്ഥാനത്തെ ജയിലുകളില്‍ കഴിയുന്ന തടവുകാര്‍ക്ക് അവയവദാന സൗകര്യമൊരുക്കും. ഇക്കാര്യത്തില്‍ ആവശ്യമായ നടപടികള്‍ കൈക്കൊള്ളാന്‍ മുഖ്യമന്ത്രി പിണറായി വിജയന്റെ ആദ്ധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി.
തടവുകാരുടെ കുടുംബാംഗങ്ങള്‍ക്ക് അവയവദാനം ചെയ്യാനാണ് അനുമതി നല്‍കുക. ഇതിനായി ജയില്‍ ചട്ടത്തില്‍ ആവശ്യമായ ഭേദഗതകള്‍ വരുത്തും. അവയവം ദാനം ചെയ്യുന്ന തടവുകാരന് ആവശ്യമായ വിദഗ്ദ്ധ ചികിത്സയും മരുന്നും ഭക്ഷണവും സര്‍ക്കാരിന്റെ ഉത്തരവാദിത്വമായി കണ്ട് പ്രത്യേകമായി നല്‍കാന്‍ ജയില്‍ അധികൃതര്‍ ശ്രദ്ധിക്കണമെന്ന് മുഖ്യമന്ത്രി നിര്‍ദ്ദേശിച്ചു. ജയിലിലെ ആശുപത്രി സംവിധാനങ്ങള്‍ മെച്ചപ്പെടുത്തും. അടിസ്ഥാന സൗകര്യങ്ങള്‍ വര്‍ദ്ധിപ്പിക്കും. അവയവദാനം നടത്തിയ തടവുകാരന് പരോള്‍ നല്‍കുന്ന കാര്യം ജയില്‍ വകുപ്പ് പരിശോധിച്ച് തീരുമാനിക്കും.
ചീഫ് സെക്രട്ടറി നളിനിനെറ്റോ, ലോ സെക്രട്ടറി ബി.ജി. ഹരീന്ദ്രനാഥ്, ജയില്‍ എ.ഡി.ജി.പി ആര്‍. ശ്രീലേഖ, ആഭ്യന്തര വകുപ്പ് അഡീഷണല്‍ ചീഫ് സെക്രട്ടറി സുബ്രതോവിശ്വാസ്, ആരോഗ്യ വകുപ്പ് സെക്രട്ടറി രാജീവ് സദാനന്ദന്‍, ഡി.എം.ഇ. ഡോ. റംലാ ബീവി, ഡെപ്യൂട്ടി ഡി.എം.ഇ. ഡോ. ശ്രീകുമാരി എന്നിവര്‍ പങ്കെടുത്തു.
