പ്രേക്ഷകര്‍ക്ക് ഞെട്ടണോ: സന്തോഷ് പണ്ഡിറ്റും ലേഡി പണ്ഡിറ്റും ഒന്നിക്കുന്നു
സന്തോഷ് പണ്ഡിറ്റ് എന്തുചെയ്താലും അത് വാര്‍ത്തയാണ്. സ്വന്തം സിനിമ നിറുത്തിവച്ച് മമ്മൂട്ടി ചിത്രത്തില്‍ അഭിനയിക്കാന്‍ സന്തോഷ് എത്തുന്നുവെന്നതായിരുന്നു ഏറ്റവും ഒടുവിലത്തെ വാര്‍ത്ത. ഇപ്പോള്‍ ഇതാ ലേഡി പണ്ഡിറ്റ് എന്ന് അറിയപ്പെടുന്ന മിനി റിച്ചാര്‍ഡുമായി ചേര്‍ന്ന് സന്തോഷ് പണ്ഡിറ്റ് അഭിനയിക്കുന്നുവെന്നാണ് റിപ്പോര്‍ട്ട്.
ഒരു ആല്‍ബം കൊണ്ടു മലയാളികളെ മുഴുവന്‍ ഞെട്ടിച്ചയാളാണു മിനി റിച്ചാര്‍ഡ്. സന്തോഷ് പണ്ഡിറ്റ് ഇപ്പോള്‍ അഭിനയിക്കുന്ന മമ്മൂട്ടി ചിത്രത്തിന്റെ വര്‍ക്കുകള്‍ പൂര്‍ത്തിയായ ശേഷം മിനി റിച്ചാര്‍ഡിനെ നായികയാക്കിയുള്ള സിനിമയുടെ പ്രവര്‍ത്തനങ്ങള്‍ ആരംഭിക്കും എന്നു പറയുന്നു. പതിവില്‍ നിന്നു വ്യത്യസ്ഥമായി പണ്ഡിറ്റ് ഇത്തവണ നിര്‍മാതാവാകില്ല, പകരം മിനി റിച്ചാര്‍ഡായിരിക്കും പണം മുടക്കുക.
ഒരു ഇന്ത്യന്‍ യുവാവിന്റെയും അമേരിക്കയില്‍ സ്ഥിരതാമസമാക്കിയ യുവതിയുടേയും കഥയാണു ചിത്രം പറയുന്നത് എന്നു പറയുന്നു. ആദ്യമായാണു പണ്ഡിറ്റിന്റെ ഒരു ചിത്രത്തിന്റെ ഷൂട്ടിങ് കേരളത്തിനു പുറത്തു നടക്കുന്നതെന്ന പ്രത്യേകതയും ഉണ്ട്. കൊച്ചി, ബാംഗ്ലൂര്‍, ന്യൂയോര്‍ക്ക് എന്നിവിടങ്ങിലാണു ഷൂട്ടിങ്. കോട്ടയം കുറുപ്പുന്തറ സ്വദേശിയാണു മിനി. ഒരു സിനിമ വാരികയാണ് ഈ വാര്‍ത്ത റിപ്പോര്‍ട്ട് ചെയ്തിരിക്കുന്നത്.
