കൊലയാളിയുടെ മോചനത്തിനായി പൊതുയോഗം; മുഹമ്മദ് നിഷാം കാരുണ്യവാനും ധന സഹായിയും…
സുരക്ഷാ ജീവനക്കാരന്‍ ചന്ദ്രബോസിനെ തന്റെ വാഹനം ഉപയോഗിച്ച് ഇടിപ്പിച്ചു കൊന്നതിനു ജയില്‍ ശിക്ഷ അനുഭവിക്കുന്ന മുഹമ്മദ് നിഷാമിന്റെ മോചനത്തിനായി നാട്ടുകാരുടെ വക പൊതുയോഗം സംഘടിപ്പിക്കുന്നു. ഇന്ന് അന്തിക്കാടിനു സമീപം മുറ്റിച്ചൂരിലാണ് യോഗം. ചന്ദ്രബോസ് വധക്കേസില്‍ ജീവപര്യന്തം കഠിന തടവിനു ശിക്ഷിക്കപ്പെട്ട് നിലവില്‍ കണ്ണൂര്‍ സെന്‍ട്രല്‍ ജയിലില്‍ കഴിയുന്ന നിഷാമിനെ ജയില്‍ മോചിതനാക്കണമെന്നാവശ്യപ്പെട്ടാണ് ഇന്നത്തെ യോഗം.
അതേ സമയം തന്നെ മുഹമ്മദ് നിഷാം പൊതുകാര്യ ധനസഹായിയാണെന്നും കാരുണ്യവാനാണെന്നും ചൂണ്ടിക്കാട്ടി നോട്ടീസ് പ്രചരണവും തുടങ്ങിയിട്ടുണ്ട്. എന്നാല്‍ നോട്ടീസില്‍ ചന്ദ്രബോസിന്റെ മരണം യാദൃശ്ചികമാണെന്ന വിശദീകരണമാണുള്ളത്.
പൊതുകാര്യ ധനസഹായി, കാരുണ്യ ധര്‍മസ്‌നേഹി, കായികസംരംഭ പ്രവര്‍ത്തകന്‍ എന്നിവയാണു കൊലക്കേസ് പ്രതിക്കുള്ള വിശേഷങ്ങളായി നല്‍കിയിരിക്കുന്നത്. കൂടാതെ യാദൃശ്ചികമായുള്ള പ്രകോപനങ്ങളാലുണ്ടായ നിര്‍ഭാഗ്യകരമായ സംഭവമെന്നാണു ചന്ദ്രബോസിന്റെ കൊലപാതകത്തെ വിശേഷിപ്പിപ്പിച്ചിരിക്കുന്നത്.മാധ്യമങ്ങള്‍ കാര്യങ്ങള്‍ പെരുപ്പിച്ചു നിഷാമിനെ കൊടുംഭീകരനാക്കിയെന്നും നിഷാം ജയിലില്‍ കിടക്കുന്നത് അദേഹത്തിന്റെ സ്ഥാപനങ്ങളിലെ ആയിരക്കണക്കിനു തൊഴിലാളി കുടുംബങ്ങളെ ബാധിക്കുമെന്നും പറഞ്ഞാണു പൊതുയോഗത്തിനുള്ള നോട്ടീസ് തയ്യാറാക്കിയിരിക്കുന്നത്.
ഇന്ന് ഉച്ചയ്ക്കു രണ്ടിനു നടക്കുന്ന യോഗത്തിനു പിന്നില്‍ നിഷാമിന്റെ സുഹൃത്തുക്കളും തൊഴിലാളികളുമാണ്.സെക്യൂരിറ്റി ജീവനക്കാരനായിരുന്ന ചന്ദ്രബോസിനെ ആഡംബരവാഹനം ഇടിപ്പിച്ചും മര്‍ദിച്ചും അതിക്രൂരമായി കൊലപ്പെടുത്തിയ കേസിലാണ് മുഹമ്മദ് നിഷാം ജയില്‍ ശിക്ഷ അനുഭവിക്കുന്നത്.
