പിതാവിന് പരസ്യ പിന്തുണയുമായി കെബി ഗണേഷ്‌കുമാര്‍; എല്‍ഡിഎഫിനൊപ്പം ഉറച്ചുനില്‍ക്കും
കേരള കോണ്‍ഗ്രസ് ബി. ചെയര്‍മാന്‍ ആര്‍.ബാലകൃഷ്ണപിള്ളക്ക് കാബിനറ്റ് പദവിയോടെ മുന്നാക്ക വികസന കോര്‍പറേഷന്‍ ചെയര്‍മാന്‍ സ്ഥാനം നല്‍കിയതുമായി ബന്ധപ്പെട്ട് കേരള കോണ്‍ഗ്രസ് ബിയില്‍ ഭിന്നതയുണ്ടെന്ന പ്രചാരണങ്ങള്‍ക്ക് മറുപടിയുമായി കെ.ബി.ഗണേഷ്‌കുമാര്‍. കാബിനറ്റ് പദവി നല്‍കിയ ഇടതുസര്‍ക്കാര്‍ നടപടിയെ കെ.ബി. ഗണേഷ്‌കുമാര്‍ എം.എല്‍.എ. സ്വാഗതം ചെയ്തു.
താനും അച്ഛനും തമ്മില്‍ പിണക്കമൊന്നുമില്ല. അച്ഛന്‍ കുറ്റം പറഞ്ഞാലും താന്‍ തിരികെ ഒന്നും പറയില്ല. മന്ത്രിപദവിയോടും സ്ഥാനമാനങ്ങളോടും തനിക്ക് താല്‍പര്യമില്ലെന്നും യു.ഡി.എഫ് വിട്ടതിന് പലവിധ കാരണങ്ങള്‍ ഉണ്ടെന്നും എല്‍.ഡി.എഫിനൊപ്പം ഉറച്ചുനില്‍ക്കുമെന്നും ഗണേഷ് കുമാര്‍ പറഞ്ഞു.
സര്‍ക്കാറിന്റെ ഒന്നാം വാര്‍ഷികാഘോഷത്തോടനുബന്ധിച്ച് പത്തനാപുരത്ത് സംഘടിപ്പിച്ച ചടങ്ങില്‍ സംസാരിക്കുകയായിരുന്നു അദ്ദേഹം. വിവാദങ്ങള്‍ പുകയുന്നതിനിടെയാണ് ഗണേഷ്‌കുമാര്‍ പിതാവിന് പരസ്യപിന്തുണയുമായി രംഗത്തെത്തിയിരിക്കുന്നത്.
