പുതിയ ബാങ്ക് അക്കൗണ്ടുകള്‍ക്ക് ഇനി ആധാര്‍ നിര്‍ബന്ധം: കേന്ദ്ര സര്‍ക്കാര്‍ ഉത്തരവിറക്കി, ഡിസംബര്‍ 31നു ശേഷം ആധാര്‍ ലിങ്ക് ചെയ്യാത്ത അക്കൗണ്ടുകള്‍ റദ്ദ് ചെയ്യും
ബാങ്കുകളില്‍ പുതിയ അക്കൗണ്ടുകള്‍ തുറക്കാന്‍ ആധാര്‍ നിര്‍ബന്ധമാക്കി കേന്ദ്രസര്‍ക്കാരിന്റെ പുതിയ ഉത്തരവ്. ഇതുവഴി വീണ്ടും ആധാറില്‍ പിടിമുറുക്കിയിരിക്കുകയാണ് കേന്ദ്രം. കൂടാതെ 50,000 രൂപയ്ക്ക് മുകളിലുളള ഇടപാടുകള്‍ക്കും ആധാര്‍ നമ്പര്‍ നിര്‍ബന്ധമാക്കി. നിലവിലെ ബാങ്ക് അക്കൗണ്ടുകള്‍ ഡിസംബര്‍ 31ന് മുമ്പ് ആധാറുമായി ലിങ്ക് ചെയ്യുകയും വേണം.
ഡിസംബര്‍ 31ന് ശേഷം ആധാര്‍ നമ്പര്‍ ലിങ്ക് ചെയ്യാത്ത അക്കൗണ്ടുകള്‍ വഴി ഇടപാടുകള്‍ നടത്താന്‍ സാധിക്കുകയില്ല. അത് കൂടാതെ അക്കൗണ്ട് റദ്ദാക്കല്‍ നടപടിയും നേരിടേണ്ടി വരും. കേന്ദ്ര റവന്യു മന്ത്രാലയത്തിന്റെതാണ് പുതിയ ഉത്തരവ്. പാന്‍ നമ്പറിനെ ആധാറുമായി ബന്ധിപ്പിക്കണമെന്നുളള കേന്ദ്രനിര്‍ദേശം സുപ്രീംകോടതി ശരിവെച്ചതിന് പിന്നാലെയാണ് കേന്ദ്രത്തിന്റെ പുതിയ ഉത്തരവ്.
