ഡോര്‍സെറ്റ് കേരള കമ്മ്യൂണിറ്റിയുടെ ഇന്‍ഡോര്‍-ഔട്ട്‌ഡോര്‍ സ്‌പോര്‍ട്‌സ് & ഗെയിംസ് അവിസ്മരണമാക്കി സംഘാടകര്‍
ഡോര്‍സെറ്റ് കേരള കമ്മ്യൂണിറ്റിയുടെ ഈ വര്‍ഷത്തെ ഇന്‍ഡോര്‍ & ഔട്ട്‌ഡോര്‍ സ്‌പോര്‍ട്ട്‌സ് ജൂണ്‍ 17, 18 തീയതികളില്‍ നടത്തപ്പെട്ടു. ജൂണ്‍ പതിനേഴിന് രാവിലെ പത്തുമണിക്ക് Ashdown Leisure സെന്ററില്‍ ആരംഭിച്ച ബാഡ്മിന്റണ്‍ ടൂര്ണമെന്റോടു കൂടി ഇന്‍ഡോര്‍ സ്‌പോര്‍ട്‌സിനു തുടക്കമായി. തുടര്‍ന്ന് ഉച്ചക്ക് ശേഷം St. Clements ഹാളില്‍ നടത്തപ്പെട്ട ചെസ്സ്, കാരംസ്, ചീട്ടുകളി തുടങ്ങിയ വാശിയേറിയ മത്സരങ്ങളോടെ ഇന്‍ഡോര്‍ സ്‌പോര്‍ട്‌സിനു അവസാനമായി.
ജൂണ്‍ പതിനെട്ടിന് രാവിലെ പത്തു മുതല്‍ വൈകുന്നേരം അഞ്ചു വരെ Branksome Recreation ഗ്രൗണ്ടില്‍ നടന്ന ഔട്ട്‌ഡോര്‍ സ്‌പോര്‍ട്ട്‌സ് വ്യത്യസ്ത മത്സരങ്ങള്‍ കൊണ്ടും ജന പങ്കാളിത്തം കൊണ്ടും വന്‍ വിജയമായി മാറി. ഉച്ചക്ക് അംഗങ്ങള്‍ തയ്യാറാക്കിയ ഭക്ഷണവും കുട്ടികള്‍ക്കുള്ള പ്രത്യേക ഭക്ഷണവും അനുഗ്രഹീതമായ കാലാവസ്ഥയും പങ്കെടുത്തവര്‍ക്കെല്ലാം ഒരു പിക്‌നിക്കിന്റെ പ്രതീതി സമ്മാനിച്ചു.
വിജയികള്‍ക്കെല്ലാം അടുത്ത സെപ്റ്റംബര്‍ രണ്ടാം തീയതി നടക്കുന്ന ഓണാഘോഷ പരിപാടിയില്‍ സമ്മാനങ്ങള്‍ വിതരണം ചെയ്യുന്നതായിരിക്കുമെന്നു ഡികെസിയുടെ സംഘാടകസമിതി അറിയിച്ചു.
