പഞ്ചാബ് നാഷണല്‍ ബാങ്കിന്റെ എടിഎം കാര്‍ഡുകള്‍ ബ്ലോക്ക് ചെയ്യപ്പെടും ; നടപടി ഈ മാസാവസാനത്തോടെ
ഈ മാസം അവസാനത്തോടെ പഞ്ചാബ് നാഷണല്‍ ബാങ്കിന്റെ എ.ടി.എം. കാര്‍ഡുകള്‍ ബ്ലോക്ക് ചെയ്യപ്പെടും. കൂടുതല്‍ സുരക്ഷിതമായ ഇ.എം.വി. ചിപ്പുകള്‍ ഘടിപ്പിക്കാത്ത കാര്‍ഡുകളാണ് ഈ മാസം അവസാനത്തോടെ ഉപയോഗരഹിതമാവുക.
മാസ്‌ട്രോ ഡെബിറ്റ് കാര്‍ഡുകള്‍ മാറ്റി ഇ.എം.വി. ചിപ്പു ഘടിപ്പിച്ച കാര്‍ഡുകള്‍ ഇപ്പോള്‍ എല്ലാ ബാങ്ക് ബ്രാഞ്ചുകളില്‍ നിന്നും മാറ്റി വാങ്ങുന്നതിനുള്ള സൗകര്യം ഒരുക്കിയിട്ടുണ്ട്. ജൂലൈ മുപ്പത്തൊന്നു മുതല്‍ എല്ലാ മാസ്‌ട്രോ കാര്‍ഡുകളും ബ്ലോക്ക് ചെയ്യപ്പെടുകയോ ഹോട്ട്‌ലിസ്റ്റ് ചെയ്യപ്പെടുകയോ ചെയ്യുമെന്ന് പി.എന്‍.ബി. വക്താവ് അറിയിച്ചു.
2015 ല്‍ പുറത്തിറക്കിയ ആര്‍.ബി.ഐ. നിര്‍ദേശപ്രകാരമാണ് പുതിയ നടപടി. പഞ്ചാബ് നാഷണല്‍ ബാങ്ക് മാത്രമല്ല, മറ്റു ബാങ്കുകള്‍ക്കും ഈ നിര്‍ദേശം നല്‍കിയിട്ടുണ്ട്. ഉടന്‍ തന്നെ മറ്റു ബാങ്കുകളിലും ഇത് നടപ്പില്‍ വരുത്തും. പഴയ മാസ്‌ട്രോ കാര്‍ഡുകള്‍ ഉപയോഗിക്കുന്ന ഒരു ലക്ഷം ഉപഭോക്താക്കള്‍ ഇപ്പോള്‍ ബാങ്കിനുണ്ട്.
എല്ലാവരെയും മെസേജ് വഴി വിവരമറിയിച്ചുകൊണ്ടിരിക്കുന്നു. 5.65 കോടിയുടെ മൂല്യമുള്ള കാര്‍ഡുകള്‍ ആണ് ഇപ്പോള്‍ പഞ്ചാബ് നാഷണല്‍ ബാങ്കിന്റെ കീഴില്‍ ഉള്ളത്.
വാലിഡിറ്റി പിരീഡ് നോക്കാതെ എല്ലാ കാര്‍ഡുകളും 2018 ഡിസംബര്‍ മാസത്തിനു മുന്‍പ് ഇ.എം.വി. ചിപ്പുകള്‍ ഘടിപ്പിക്കണം എന്നാണു നിര്‍ദേശം.
