ഓഗസ്റ്റ് സിനിമാസില്‍ നിന്നും പൃഥ്വിരാജ് പിന്മാറി ; ലക്‌ഷ്യം സ്വന്തമായ നിര്‍മ്മാണകമ്പനി
മലയാളത്തിലെ യുവസൂപ്പര്‍സ്റ്റാര്‍ ആയ പൃഥ്വിരാജിനു പങ്കാളിത്തമുള്ള ഒരു നിര്‍മ്മാണ കമ്പനിയായിരുന്നു ‘ഓഗസ്റ്റ് സിനിമ’.പൃഥ്വിരാജിനെ കൂടാതെ ഷാജി നടേശന്‍, സന്തോഷ് ശിവന്‍ പിന്നെ തമിഴ് താരമായ ആര്യ എന്നിവരായിരുന്നു മറ്റു പങ്കാളികള്‍. മലയാള സ്നിമയ്ക്ക് ഒരുപിടി സൂപ്പര്‍ഹിറ്റ് ചിത്രങ്ങള്‍ സമ്മാനിച്ച നിര്‍മാണ കമ്പനിയായ ‘ഓഗസ്റ്റ് സിനിമ’യില്‍നിന്ന് പൃഥ്വിരാജ് പിന്‍മാറുന്നു എന്നാണു ഇപ്പോള്‍ വരുന്ന റിപ്പോര്‍ട്ടുകള്‍. ആറുവര്‍ഷത്തിലേറെക്കാലം കമ്പനിയില്‍ പൃഥ്വിരാജിന്റെ പങ്കാളിത്തമുണ്ടായിരുന്നു. പുതിയൊരു ദിശയില്‍ യാത്ര ആംഭിക്കാന്‍ സമയമായതുകൊണ്ടാണ് പിന്മാറാന്‍ തീരുമാനിച്ചതെന്ന് അദ്ദേഹം അറിയിച്ചു. ഒരുപിടി ഓര്‍മകളും ഹൃദയം നിറയെ കൃതജ്ഞതയുമായി ഓഗസ്റ്റ് സിനിമയോട് വിടപറയുകയാണെന്ന് പൃഥ്വിരാജ് വ്യക്തമാക്കി.
കമ്പനിയുടെ അഭ്യുദയകാംക്ഷികളില്‍ അഗ്രസ്ഥാനത്ത് താന്‍ എന്നുമുണ്ടാകുമെന്നും അദ്ദേഹം കൂട്ടിച്ചേര്‍ത്തു. 2011ലാണ് ഓഗസ്റ്റ് സിനിമാ കമ്പനിയുടെ തുടക്കം. സന്തോഷ് ശിവന്‍ സംവിധാനം ചെയ്ത ബിഗ് ബജറ്റ് ചിത്രം ഉറുമിയായിരുന്നു ആദ്യ സംരംഭം. ഇതില്‍ പൃഥ്വിരാജ് തന്നെയായിരുന്നു നായകന്‍. കമ്പനിയുടെ രണ്ടാമത്തെ ചിത്രമായ ഇന്ത്യന്‍ റുപ്പി സംസ്ഥാന അവാര്‍ഡ് നേടി. ബോക്‌സോഫീസില്‍ മികച്ച കലക്ഷന്‍ നേടിയ ചിത്രം കൂടിയാണിത്. മമ്മൂട്ടി നായകനായ കടല്‍ കടന്നൊരു മാത്തുക്കുട്ടിയായിരുന്നു മൂന്നാമത്തെ ചിത്രം. മമ്മൂട്ടി തന്നെ നായകനായ ഗ്രേറ്റ്ഫാദര്‍ ആയിരുന്നു അവസാന ചിത്രം. അതേസമയം സ്വന്തമായി നിര്‍മ്മാണകമ്പനി ആരംഭിക്കുവാന്‍ വേണ്ടിയാണ് പൃഥ്വിരാജ് ഓഗസ്റ്റ് സിനിമ’യില്‍നിന്ന് പിന്മാറുന്നത് എന്നും വിവരങ്ങള്‍ ഉണ്ട്. അതുപോലെ മോഹന്‍ലാലിനെ നായകനാക്കി ലൂസിഫര്‍ എന്ന ചിത്രം സംവിധാനം ചെയ്യാനുള്ള തയ്യാറെടുപ്പിലാണ് പൃഥ്വിരാജ് ഇപ്പോള്‍.
