പോലീസ് വിചാരിച്ചാല്‍ 19 അല്ല 190 തെളിവുകള്‍ വരെ ദിലീപിനെതിരെ ഉണ്ടാക്കാന്‍ സാധിക്കുമെന്ന് രാംകുമാര്‍
ദിലീപിനെതിരെ കൃത്രിമതെളിവുകള്‍ മാത്രമാണ് നിലനില്‍ക്കുന്നതെന്ന് നടന് വേണ്ടി ഹാജരായ മുതിര്‍ന്ന അഭിഭാഷകന്‍ രാംകുമാര്‍. ദിലീപിന് വേണ്ടി കോടതിയില്‍ നാളെ ജാമ്യാപേക്ഷ നല്‍കുമെന്നും അഡ്വ. രാംകുമാര്‍ മാധ്യമപ്രവര്‍ത്തകരോട് പറഞ്ഞു.
പോലീസ് വിചാരിച്ചാല്‍ 19 അല്ല 190 തെളിവുകള്‍ വരെ ദിലീപിനെതിരെ ഉണ്ടാക്കാന്‍ സാധിക്കുമെന്ന് രാംകുമാര്‍ പറഞ്ഞു. തെളിവുകള്‍ 19 ആക്കി പരിമിതപ്പെടുത്തി എന്നതില്‍ താന്‍ അത്ഭുതപ്പെടുന്നുവെന്നും രാംകുമാര്‍ മാധ്യമപ്രവര്‍ത്തകരോട് പറഞ്ഞു.
ദിലീപിനെതിരായി പോലീസ് ഹാജരാക്കിയ തെളിവുകള്‍ കെട്ടിച്ചമച്ചതാണ്. തെളിവില്ലാത്ത കേസില്‍ ഒരാളെ ശിക്ഷിക്കണമെങ്കില്‍ നേരായ മാര്‍ഗത്തിലൂടെ പറ്റില്ലെന്നും അദ്ദേഹം പറഞ്ഞു. കേസ് കോടതിയുടെ പരിഗണനയിലിരിക്കുന്നതിനാല്‍ കൂടുതല്‍ കാര്യങ്ങള്‍ വ്യക്തമാക്കാന്‍ സാധിക്കില്ലെന്നും രാം കുമാര്‍ വ്യക്തമാക്കി.