ബോളിവുഡ് നടി കങ്കന റനൗട്ടിന് മുഖത്ത് വെട്ടേറ്റു; വാള്‍തലപ്പ് കൊണ്ട് ആഴത്തില്‍ മുറിവേറ്റു
പ്രശസ്ത ബോളിവുഡ് നടി കങ്കന റനൗട്ടിന് സിനിമ ചിത്രീകരണത്തിനിടെ മുഖത്ത് വെട്ടേറ്റു. വാള്‍പയറ്റ് ചിത്രീകരിക്കുന്നതിനിടെയാണ് താരത്തിന് മുഖത്ത് വെട്ടേറ്റത്.
വാള്‍തലപ്പ് കൊണ്ട് പുരികത്തിനടിയില്‍ ആഴത്തില്‍ മുറിവേറ്റ കങ്കനയെ ആശുപത്രിയില്‍ പ്രവേശിപ്പിച്ചു. 15 തുന്നലുകളുള്ളതിനാല്‍ താരം ഇപ്പോഴും ആശുപത്രിയില്‍ തുടരുകയാണ്. ഒരാഴ്ച്ചയോളം ആശുപത്രി വാസം ഡോക്ടര്‍മാര്‍ നിര്‍ദ്ദേശിച്ചട്ടുണ്ട്.
സ്വാതന്ത്ര്യസമരസേനാനി റാണി ലക്ഷ്മിഭായിയുടെ ജീവചരിത്ര സിനിമയായ മണികര്‍ണികറാണി ഓഫ് ഝാന്‍സി എന്നീ ചിത്രത്തില്‍ അഭിനയിക്കുന്നതിനിടെയാണ് താരത്തിന് മുഖത്ത് വെട്ടേറ്റത്. സഹതാരം നിഹാര്‍ പാണ്ഡ്യയൊത്തുള്ള രംഗം ചിത്രീകരിക്കുന്നതിനിടെയായിരുന്നു സംഭവം. ചിത്രീകരണത്തിന് മുമ്പുതന്നെ ഡ്യൂപ്പിനെവെച്ച് ചെയ്യാമെന്ന് സംവിധായകന്‍ പറഞ്ഞെങ്കിലും കങ്കണ തയ്യാറായില്ല.
പിന്നീട് ഇരുവരും തമ്മിലുള്ള വാള്‍പ്പയറ്റ് ചിത്രീകരിക്കുകയായിരുന്നു. ചിത്രീകരണത്തിനായി ഒരാഴ്ച്ച റിഹേഴ്‌സല്‍ നടത്തിയിരുന്നെങ്കിലും ശ്രമം പരാജയപ്പെടുകയായിരുന്നു. അതേസമയം തലനാരിഴക്കാണ് താരം രക്ഷപ്പെട്ടതെന്നാണ് ഡോക്ടര്‍മാരുടെ വെളിപ്പെടുത്തല്‍.
