ഒരക്ഷരം എവിടേയും മിണ്ടരുത്; സര്‍ക്കാര്‍ ജീവനക്കാര്‍ക്ക് പുതിയ പെരുമാറ്റച്ചട്ടവുമായി പിണറായി സര്‍ക്കാര്‍, ലംഘിക്കുന്നവര്‍ക്കെതിരെ കര്‍ശന നടപടി
സര്‍ക്കാര്‍ ജീവനക്കാരുടെ പെരുമാറ്റ ചട്ടത്തില്‍ വീണ്ടും കര്‍ശന നിര്‍ദ്ദേശങ്ങളുമായി പിണറായി സര്‍ക്കാരിന്റെ പുതിയ സര്‍ക്കുലര്‍. സര്‍ക്കാരിനെതിരെ ഒന്നും മിണ്ടരുതെന്നാണ് സര്‍ക്കുലറില്‍ വ്യക്തമാക്കുന്നത്. നയങ്ങളോ നടപടികളോ ചര്‍ച്ച ചെയ്യരുതെന്ന പഴയ ഉത്തരവ് കര്‍ശനമായി പാലിക്കാണമെന്നുമാണ് പിണറായി വിജയന്‍ സര്‍ക്കാര്‍ ഉത്തരവിട്ടിരിക്കുന്നത്.
സോഷ്യല്‍ മീഡിയയിലടക്കം സര്‍ക്കാരിനെതിരെ അഭിപ്രായ പ്രകടനം സര്‍ക്കാര്‍ ജീവനക്കാര്‍ നടത്താന്‍ പാടില്ല. അഭിപ്രായ സ്വാതന്ത്രത്തെ ലംഘിക്കുന്ന തലത്തിലാണ് ഉത്തരവെന്ന വിമര്‍ശം നിലനില്‍ക്കെയാണ് കര്‍ശനമായി നടപ്പാക്കാന്‍ സര്‍ക്കാരിന്റെ തീരുമാനം.
പഴയ ഉത്തരവ് പൊടി തട്ടിയെടുത്താണ് കര്‍ശനമായി നടപ്പാക്കാന്‍ പുതിയ സര്‍ക്കുലര്‍ ഇറക്കിയത്. ലംഘിക്കുന്നവര്‍ക്കെതിരെ കര്‍ശന നടപടിയെടുക്കാന്‍ മേലധികാരികള്‍ക്ക് നിര്‍ദേശവും നല്‍കി. സര്‍ക്കാരിനെതിരെ ഒരു വേദിയിലും വിമര്‍ശനം പാടില്ലെന്നാണ് നയം.
ഗവര്‍ണ്‍മെന്റ് എടുക്കുന്ന നയങ്ങള്‍ക്കും, നടപടികള്‍ക്കുമെതിരായ ചര്‍ച്ചകള്‍ അസോസിയേഷന്‍ യോഗങ്ങളില്‍ പോലും നടത്തരുതെന്ന് സര്‍ക്കാരിന്റെ സര്‍ക്കുലര്‍. ജനുവരി 31ന് പ്രിന്‍സിപ്പള്‍ സെക്രട്ടറി സത്യജിത്ത് രാജന്‍ ഇറക്കിയ സര്‍ക്കുലര്‍ ഇപ്പോള്‍ വീണ്ടും പുറത്തിറക്കുകയായിരുന്നു.
സോഷ്യല്‍ മീഡിയയിലും, മാധ്യമങ്ങളിലും നയപരമായ കാര്യങ്ങളില്‍ അഭിപ്രായ പറയുന്നതിനും വിലക്കുണ്ട്. 1960ലെ സര്‍ക്കാര്‍ ജീവനക്കാരുടെ പെരുമാറ്റ ചട്ടം 60(എ) പ്രകാരമാണ് നടപടി. സര്‍ക്കാര്‍ നയങ്ങള്‍ക്കെതിരായി സംസാരിക്കാനോ,എഴുതാനോ പാടില്ലെന്നും സര്‍ക്കുലര്‍ ഓര്‍മ്മിപ്പിക്കുന്നുണ്ട്.
