സ്പാനിഷ് സൂപ്പര്‍ കപ്പ് ജേതാക്കളെ ഇന്നറിയാം
മാഡ്രിഡ്: സ്പാനിഷ് സൂപ്പര്‍ കപ്പ് ജേതാക്കളെ നിശ്ചയിക്കുന്ന രണ്ടാം പാദ മത്സരം റയലിന്റെ തട്ടകമായ സാന്റിയാഗോ ബെര്‍ണ്‍ബ്യൂവില്‍ ഇന്ന് നടക്കും. ബാഴ്‌സയുടെ തട്ടകത്തില്‍ നടന്ന ആദ്യ പാദത്തില്‍, ഒന്നിനെതിരെ മൂന്നു ഗോളുകള്‍ക്ക് റയല്‍ ജയിച്ചിരുന്നു. ഹോം മത്സരത്തില്‍ വഴങ്ങിയ രണ്ട് ഗോള്‍ കടവുമായാണ് ഇന്നത്തെ മത്സരത്തില്‍ ബാഴ്‌സലോണ ഇറങ്ങുന്നത്. ആര്‍ത്തിരമ്പുന്ന റയല്‍ ആരാധകര്‍ക്ക് മുന്നില്‍ ജയിച്ചു കയറാന്‍ മെസ്സിക്കും കൂട്ടുകാര്‍ക്കും ഏറെ വിയര്‍പ്പൊഴുക്കേണ്ടി വരും .
ആദ്യപാദത്തില്‍ ചുവപ്പ് കാര്‍ഡ് കണ്ട സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ അഭാവം റയലിന് തിരിച്ചടിയാവും. ലാ ലീഗയില്‍ ഡിപോര്‍ട്ടീവോ, വലന്‍സിയ, ലെവാന്റേ, റയല്‍ സോസിഡാഡ് എന്നിവര്‍ക്കെതിരെയും റൊണാള്‍ഡോയ്ക്ക് കളിക്കാനാവില്ല.
എന്നാല്‍, സസ്‌പെന്‍ഷന്‍ കഴിഞ്ഞ ലൂക്ക മോഡ്രിച്ച് റയല്‍ നിരയില്‍ തിരിച്ചെത്തും. ബെയ്ല്‍, ബെന്‍സേമ, ഇസ്‌കോ ത്രയവുമായാണ് റയല്‍ കലാശ പോരാട്ടത്തിനിറങ്ങുന്നത്. പതിവുപോലെ മെസ്സി, സുവാരസ് കൂട്ടുകെട്ടിലാണ് ബാഴ്‌സയുടെ പ്രതീക്ഷ.
ബെര്‍ണബ്യൂവില്‍ അവസാനം ഇരുടീമും ഏറ്റുമുട്ടിയപ്പോള്‍ രണ്ടിനെതിരെ മൂന്ന് ഗോളിന് ജയം ബാഴ്‌സയ്‌ക്കൊപ്പമായിരുന്നു.
