നാളെ മുതല്‍ 200 രൂപ നോട്ടുകള്‍ എത്തും; പുതിയ നോട്ടില്‍ സവിശേഷതകള്‍ ഏറെയുണ്ട്
മുംബൈ: പുതിയ 200 രൂപ നോട്ട് വെള്ളിയാഴ്ച പുറത്തിറക്കുമെന്ന് റിസര്‍വ് ബാങ്ക് ഓഫ് ഇന്ത്യ (ആര്‍ബിഐ) അറിയിച്ചു. പുതിയ 200 രൂപ നോട്ടില്‍ നിരവധി സുരക്ഷാ സവിശേഷതകള്‍ ഉള്‍പ്പെടുത്തിയാണ് പുറത്തിറക്കുന്നതെന്നു ആര്‍.ബി.ഐ അറിയിച്ചു. ആര്‍.ബി.ഐ-യുടെ തിരഞ്ഞെടുക്കപ്പെട്ട ഓഫിസുകളില്‍നിന്നും ചില ബാങ്കുകള്‍ വഴിയുമായിരിക്കും നോട്ടുകള്‍ പുറത്തിറക്കുക.
മഞ്ഞ നിറത്തിലുള്ള നോട്ടിന്റെ മുന്‍വശത്ത് രാഷ്ട്രപിതാവ് മഹാത്മാ ഗാന്ധിയുടെ ചിത്രം കാണാം. പുറക് വശത്ത് സാഞ്ചി സ്തൂപമാണുള്ളത്. റിസര്‍വ് ബാങ്ക് ഗവര്‍ണര്‍ ഊര്‍ജിത് പട്ടേലിന്റെ ഒപ്പും റിസര്‍വ് ബാങ്ക് ലോഗോയും 200ന്റെ നോട്ടില്‍ ഉണ്ടായിരിക്കും. കൂടാതെ പ്രധാനമന്ത്രി നരേന്ദ്ര മോദിയുടെ പ്രധാന പദ്ധതിയായ സ്വച്ഛ് ഭാരതിന്റെ ലോഗോയും മുദ്രാവാക്യവും നോട്ടില്‍ ഉള്‍പ്പെടുത്തിയിട്ടുണ്ട്.
കഴിഞ്ഞ വര്‍ഷം നവംബറില്‍ കേന്ദ്രസര്‍ക്കാര്‍ നടപ്പിലാക്കിയ നോട്ടുനിരോധനത്തെത്തുടര്‍ന്നു സാന്പത്തിക മേഖലയിലുണ്ടായ പ്രതിസന്ധി പരിഹരിക്കുന്നതിനും, ഇടപാടുകള്‍ സുഗമമായി നടക്കുന്നതിനും വേണ്ടിയാണ് പുതിയ 200 രൂപ നോട്ടുകള്‍ പുറത്തിറക്കുന്നത്.
