കാശ്മീരില്‍ സൈനിക ക്യാമ്പില്‍ വീണ്ടും ഭീകരാക്രമണം ; എട്ടു സൈനികര്‍ കൊല്ലപ്പെട്ടു
ശ്രീനഗര്‍ : ജമ്മു കശ്മീരിലെ പുല്‍വാമയില്‍ ഉണ്ടായ ഭീകരാക്രമണത്തില്‍ എട്ട് സൈനികര്‍ കൊല്ലപ്പെട്ടു. അതീവ സുരക്ഷ മേഖലയായ പൊലീസ് ലൈനിലെ സൈനിക ക്യാംപില്‍ കടന്നുകയറിയാണ് ഭീകരര്‍ ആക്രമണം നടത്തിയത്.പുലര്‍ച്ചെ നാലരയ്ക്കാണ് പുല്‍വാമയിലെ ജില്ല പൊലീസ് ആസ്ഥാനവും സൈനിക ക്യാംപും സ്ഥിതി ചെയ്യുന്ന പൊലീസ് ലൈനില്‍ ഭീകരര്‍ ആക്രമണം നടത്തിയത്. ഈ സമയം നൂറുകണക്കിന് പോലീസുകാരും സി.ആര്‍.പി.എഫ് ജവാന്‍മാരും ക്യാംപിലുണ്ടായിരുന്നു. ഭീകരര്‍ വെടിവയ്ക്കുകയും ഗ്രനേഡ് എറിയുകയും ചെയ്തു.
സൈന്യം തിരിച്ച് വെടിവച്ചതോടെ ഭീകരര്‍ പിന്‍വാങ്ങി. കെട്ടിടത്തില്‍ ഒളിച്ചിരിക്കുന്ന ഒരു ഭീകരനായി തിരച്ചില്‍ ശക്തമാക്കിയിട്ടുണ്ട്. സൈന്യം മേഖല വളഞ്ഞു. നാട്ടുകാരെയും സുരക്ഷ ഉദ്യോഗസ്ഥരുടെ കുടുംബാംഗങ്ങളേയും ഒഴിപ്പിച്ചു. തന്ത്രപ്രധാന മേഖലയില്‍ ഭീകരര്‍ അതിക്രമിച്ചുകയറിയതിലെ സുരക്ഷ വീഴ്ച്ചയും സൈന്യം പരിശോധിക്കുന്നുണ്ട്. അതേസമയം സൈന്യത്തിന്റെ ശക്തമായ തിരിച്ചടിയില്‍ മൂന്ന് ഭീകരരെ വധിച്ചു.
