മരത്തില്‍ കുടുങ്ങിയ ഇയര്‍ ഫോണ്‍ എടുക്കുവാന്‍ വേണ്ടി യുവാവ് സ്വന്തം ജീവന്‍ കളഞ്ഞു
മരചില്ലയില്‍ കുടുങ്ങിയ തന്‍റെ ഇയര്‍ഫോണ്‍ എടുക്കാന്‍ ശ്രമിച്ച യുവാവ് ഷോക്കേറ്റ് മരിച്ചു. ഗംഗാ രവീന്ദര്‍ എന്ന 30കാരനായ യുവാവാണ് മരിച്ചത്. സുഹൃത്തുക്കള്‍ നോക്കി നില്‍ക്കെയായിരുന്നു യുവാവിന്റെ അന്ത്യം. തന്‍റെ താമസ സ്ഥലത്ത് നിന്നും പുറത്തേയ്ക്ക് പോയ സമയം ഇയര്‍ഫോണ്‍ എടുക്കാന്‍ മറന്ന ഗംഗാ രവീന്ദര്‍ സുഹൃത്തുക്കളോട് ബാല്‍ക്കണിയില്‍ നിന്ന് ഇയര്‍ഫോണ്‍ താഴേക്ക് ഇട്ട് നല്‍കാന്‍ ആവശ്യപ്പെടുകയായിരുന്നു. എന്നാല്‍ സുഹൃത്ത് ഇട്ട് നല്‍കിയ ഇയര്‍ഫോണ്‍ അടുത്തുണ്ടായിരുന്ന ഒരു മരത്തിന്റെ ചില്ലയില്‍ കുടുങ്ങി.
തുടര്‍ന്ന് അത് എടുക്കാന്‍ ഇരുമ്പ് കമ്പി ഉപയോഗിച്ചതാണ് യുവാവിന്റെ ജീവന്‍ നഷ്ടമാകുവാന്‍ കാരണമായത്. ഇരുമ്പ് കമ്പി വൈദ്യുതി ലൈനില്‍ കുടുങ്ങി ഗംഗയ്ക്ക് ഷോക്കേല്‍ക്കുകയായിരുന്നു. ഗംഗയോടൊപ്പമുണ്ടായിരുന്ന മറ്റൊരു സുഹൃത്തിനും പരിക്കേറ്റിട്ടുണ്ടെന്ന് പോലീസ് വ്യക്തമാക്കി. പരിക്കേറ്റയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്.
