ദേരാ സച്ചാ സൗദ ആസ്ഥാനത്തുനിന്നും പിടികൂടിയ ആയുധങ്ങള്‍ കണ്ട് പോലീസ് പോലും ഞെട്ടി
ബലാത്സംഗക്കേസില്‍ ജയിലിലായ ഗുര്‍മീത് സിംഗിന്റെ സിര്‍സയിലെ ആശ്രമത്തില്‍ വന്‍ ആയുധശേഖരം. ബലാത്സംഗക്കേസില്‍ ആള്‍ദൈവം ഗുര്‍മീത് റാം റഹീം സിങ്ങിന് 20 വര്‍ഷം തടവുശിക്ഷ ലഭിച്ചതിന് പിന്നാലെ പോലീസ് നടത്തിയ പരിശോധനയിലാണിത്. പോലീസ് പിടിച്ചെടുത്ത നിരവധി തോക്കുകള്‍ അടക്കമുള്ള ആയുധങ്ങളുടെ ചിത്രങ്ങള്‍ എ.എന്‍.ഐ വാര്‍ത്താ ഏജന്‍സി പുറത്തുവിട്ടു.
രാവിലെ പൊലീസ് നടത്തിയ തെരച്ചിലില്‍ എകെ 47 അടക്കം 37 തോക്കുകള്‍ കണ്ടെത്തി. ആശ്രമത്തിലെ ഗൂഗര്‍ഭ ഗുഹയില്‍ ഒളിപ്പിച്ച നിലയിലായിരുന്നു തോക്കുകള്‍. ഗുര്‍മീതിന്റെ സുരക്ഷയ്ക്കായി രൂപീകരിച്ച സ്വകാര്യസൈന്യത്തിന്റെ ആയുധങ്ങളാണ് പിടിച്ചെടുത്തത്.ഗുര്‍മീത് കുറ്റക്കാരനാണെന്ന് കോടതി കണ്ടെത്തിയതിന് തൊട്ടുപിന്നാലെ നടന്ന അക്രമങ്ങളെത്തുടര്‍ന്നാണ് പോലീസ് ദേരാ സച്ചാ സൗദ ആസ്ഥാനത്ത് പരിശോധന നടത്തിയത്. അനുയായികള്‍ വലിയ തോതിലാണ് അക്രമങ്ങള്‍ അഴിച്ചു വിട്ടത്.
