സംവിധായകന്‍ ഗൌതം മേനോനെയും സംഘത്തിനെയും തുര്‍ക്കിയില്‍ തടഞ്ഞു വെച്ചിരിക്കുന്നു
തമിഴിലെ സൂപ്പര്‍സ്റ്റാര്‍ വിക്രം നായകനാകുന്ന ധ്രുവനച്ചത്തിരത്തിന്റെ ചിത്രീകരണത്തിനായി തുര്‍ക്കിയില്‍ എത്തിയ സംവിധായകന്‍ ഗൌതം മേനോനെയും സംഘത്തിനെയും തുര്‍ക്കിയില്‍ തടഞ്ഞു വെച്ചിരിക്കുന്നു. ഇസ്താംബുള്‍ വഴി ജോര്‍ജിയയിലേക്ക് യാത്ര ചെയ്യാന്‍ ഷൂട്ടിംങ് സംഘം എത്തിയപ്പോഴാണ് അതിര്‍ത്തിയില്‍ വെച്ച് അധികൃതര്‍ തങ്ങളെ തടഞ്ഞു നിര്‍ത്തിയതായി ഗൗതം മേനോന്‍ പറയുന്നു. തുര്‍ക്കിയുടെ അതിര്‍ത്തിയില്‍ ഞാനും എന്റെ സംഘവും 24 മണിക്കൂറിലേറെയായി കുടുങ്ങിയിരിക്കുകയാണ്. എല്ലാ രേഖകളുണ്ടായിട്ടും ഉദ്യോഗസ്ഥര്‍ ഞങ്ങളെ കടന്നു പോകാന്‍ അനുവദിക്കുന്നില്ല.
ഉദ്യോഗസ്ഥര്‍ ആവശ്യപ്പെടുന്ന കാര്യങ്ങള്‍ ഞങ്ങള്‍ക്ക് ചെയ്യാന്‍ നിര്‍വാഹമില്ല. അതുകൊണ്ട് തടഞ്ഞ് വച്ചിരിക്കുകയാണ്. ആരെങ്കിലും ഇത് വായിക്കുന്നുണ്ടെങ്കില്‍ തങ്ങളെ സഹായിക്കണം. തന്‍റെ ഫേസ്ബുക്കിലൂടെയാണ് ഗൌതം മേനോന്‍ ഇക്കാര്യങ്ങള്‍ വെളിപ്പെടുത്തിയത്. യൂറോപ്പിലെ വിവിധ ഭാഗങ്ങളിലാണ് ധ്രുവനച്ചത്തിരം ചിത്രീകരിക്കുന്നത്.
