കേന്ദ്ര മന്ത്രി യാത്ര ചെയ്ത വിമാനത്തില്‍ കത്തി കൊണ്ട് അഭ്യാസ പ്രകടനം നടത്തി യുവാവ് ഭീതി സൃഷ്ട്ടിച്ചു
ന്യൂഡല്‍ഹി: വിമാനത്തിനുള്ളില്‍ കത്തിയുമായി എത്തിയ യുവാവ് യാത്രക്കാരെ ഭീതിയിലാഴ്ത്തി. ന്യുഡല്‍ഹി ഇന്ദിരാഗാന്ധി ഇന്റര്‍നാഷണല്‍ എയര്‍പോര്‍ട്ടിലാണ് സംഭവം.യാത്രക്കാരെയും വഹിച്ചുകൊണ്ട് ഗോവയിലേയ്ക്ക് പുറപ്പെടാനിരുന്ന ആഭ്യന്തര സര്‍വീസ് നടത്തുന്ന സ്പൈസ് ജെറ്റ് വിമാനത്തിനുള്ളിലാണ് നാടകീയ സംഭവങ്ങള്‍ അരങ്ങേറിയത്.
പരിശോധനകള്‍ പൂര്‍ത്തിയാക്കി വിമാനത്തില്‍ കയറിയ യുവാവ് ബാക്കി യാത്രികരെല്ലാം വിമാനത്തില്‍ കയറുന്നതുവരെ കാത്തിരുന്നു. എല്ലാ യാത്രക്കാരും വിമാനത്തിനുള്ളില്‍ കയറി ഇരിപ്പുറപ്പിച്ച ശേഷം ഹാന്‍ഡ് ബാഗില്‍ കരുതിയിരുന്ന കത്തിയെടുത്ത് യുവാവ് സഹയാത്രികരെ കാണിച്ചു.
ഇന്ത്യയിലെ ഏറ്റവും സെന്‍സിറ്റീവ് ആയ എയര്‍പോര്‍ട്ടിലെ സുരക്ഷ മുന്‍കരുതല്‍ എപ്രകാരമാണെന്ന് കാണിക്കാനാണ് ശ്രമിക്കുന്നതെന്ന് യുവാവ് യാത്രക്കാരോട് പറഞ്ഞു. കത്തി കാണിച്ചുള്ള യുവാവിന്റെ സംസാരം തുടരുന്നതിനിടെ വിമാനത്തിലെ ജീവനക്കാര്‍ ഇയാളെ പിടികൂടി എയര്‍പോര്‍ട്ട് സുരക്ഷ ഉദ്യോഗസ്ഥര്‍ക്ക് കൈമാറുകയുമായിരുന്നു.കേന്ദ്ര മന്ത്രി ജീതേന്ദ്ര സിംഗും വിമാനത്തിലുണ്ടായിരുന്നു.
