സൂപ്പര്‍ സിന്ധു; കൊറിയ ഓപ്പണ്‍ ബാഡ്മിന്റണില്‍ ഇന്ത്യന്‍ താരം പി വി സിന്ധു ഫൈനലില്‍
കൊറിയ ഓപ്പണ്‍ സൂപ്പര്‍ സീരിസ് ബാഡ്മിന്റണില്‍ ഇന്ത്യയുടെ ഒളിമ്പിക്‌സ് വെള്ളി മെഡല്‍ ജേത്രി പി.വി. സിന്ധു ഫൈനലില്‍ കടന്നു. ഫൈനലില്‍ ജപ്പാന്റെ നൊസോമി ഒക്കുഹാരയെയാണ് സിന്ധു നേരിടുക.
കഴിഞ്ഞ മാസം നടന്ന ലോകചാമ്പ്യന്‍ഷിപ്പില്‍ ഏറ്റ തോല്‍വിക്ക് മധുര പ്രതികാരം വീട്ടുക എന്ന ലക്ഷ്യവുമായിട്ടാകും സിന്ധു ഫൈനലിലിറങ്ങുക. കഴിഞ്ഞ മാസം നടന്ന ലോകചാമ്പ്യന്‍ഷിപ്പ് ഫൈനലില്‍ മൂന്ന് ഗെയിം നീണ്ട പോരാട്ടത്തില്‍ സിന്ധുവിനെ തോല്‍പ്പിച്ച് ഒക്കുഹാര കിരീടം സ്വന്തമാക്കിയിരുന്നു. നാളെയാണ് ഫൈനല്‍
സെമിയില്‍ ചൈനയുടെ ഹി ബിങ് ജിയോയെ ഒന്നിനെതിരെ മൂന്ന് ഗെയിമുകള്‍ക്ക് തകര്‍ത്താണ് സിന്ധു കലാശപ്പോരിന് അര്‍ഹത നേടിയത്. സ്‌കോര്‍ 21-10, 17-21, 21-16. മത്സരം ഒരു മണിക്കൂര്‍ നീണ്ടുനിന്നു. കഴിഞ്ഞ ദിവസം നടന്ന ക്വാര്‍ട്ടര്‍ മത്സരത്തിലും മൂന്ന് ഗെയിം നീണ്ട പോരാട്ടത്തിനൊടുവിലായിരുന്നു സിന്ധു വിജയിച്ചത്. സിന്ധുവിന്റെ ഈവര്‍ഷത്തെ രണ്ടാം സൂപ്പര്‍ സീരീസ് ഫൈനലാണിത്. നേരത്തെ ഏപ്രിലില്‍ ഇന്ത്യ ഓപ്പണ്‍ സൂപ്പര്‍ സീരീസ് കിരീടം സിന്ധു സ്വന്തമാക്കിയിരുന്നു.
സ്വന്തം നാട്ടുകാരിയായ അകാനെ യാമഗുച്ചിയെ നേരിട്ടുള്ള ഗെയിമുകള്‍ക്ക് തകര്‍ത്താണ് ഒക്കുഹാര ഫൈനലിലേക്ക് മുന്നേറിയിരിക്കുന്നത്. സ്‌കോര്‍ 21-17, 21-18.
