28ന് ഒരു പണിയുണ്ട് സഹമുറിയന്റെ പള്ളക്ക് കുത്താനാണേ;തിയ്യറ്റര്‍ തകര്‍ക്കും, രാമലീലയ്‌ക്കെതിരായ എഫ്ബി പോസ്റ്റില്‍ ഐജിക്ക് പരാതി നല്‍കി
പുറത്തിറങ്ങാനിരിക്കുന്ന ദിലീപിന്റെ ‘രാമലീല’ എന്ന സിനിമ പ്രദര്‍ശിപ്പിക്കാനുദ്ദേശിക്കുന്ന തിയറ്ററുകള്‍ തകര്‍ക്കണമെന്ന ആഹ്വാനത്തിനെതിരെ നിര്‍മാതാവ് ടോമിച്ചന്‍ മുളകുപാടത്തിന്റെ പരാതി.
ചലച്ചിത്ര അക്കാദമി എക്‌സിക്യൂട്ടീവ് അംഗം ജി.പി.രാമചന്ദ്രനെതിരെയാണ് ഐ.ജി. പി.വിജയന് ടോമിച്ചന്‍ പരാതി നല്‍കിയത്. പൈറസി പ്രോത്സാഹിപ്പിക്കുന്ന വിധത്തില്‍ ഫെയ്‌സ്ബുക്കില്‍ പോസ്റ്റിട്ടതായും ടോമിച്ചന്‍ തന്റെ പരാതിയില്‍ പറയുന്നുണ്ട്. പരാതി സിറ്റി പോലീസ് കമ്മീഷണര്‍ക്ക് കൈമാറി.
കലാപത്തിന് ആഹ്വാനം നല്‍കുന്നതിന് തുല്യമാണ് തിയേറ്ററുകള്‍ തകര്‍ക്കുക എന്ന ആഹ്വാനത്തിലൂടെ ജിപി രാമചന്ദ്രന്‍ നടത്തിയിരിക്കുന്നതെന്നും പരാതിയില്‍ പറയുന്നു.
‘രാമലീല’യുടെ റിലീസ് തിയ്യതി പ്രഖ്യാപിച്ചതിനു പിന്നാലെയാണ് ‘സെപ്റ്റംബര്‍ 28ന് ഈ അശ്ലീല സിനിമ കാണിക്കാനുദ്ദേശിക്കുന്ന തിയറ്ററുകള്‍ തകര്‍ക്കണം’ എന്ന് രാമചന്ദ്രന്‍ പോസ്റ്റ് ചെയ്തത്. #BoycottRaamleela എന്ന ഹാഷ്ടാഗോടെയായിരുന്നു പോസ്റ്റ്.
‘രാം ലീലലോയ രാംകഥയോ എന്താണെങ്കിലും വേണ്ടില്ല, അശ്ലീലമനസ്‌കന്റെ സിനിമയുമായി തിയറ്ററുകളിലേക്ക് വരാമെന്ന് വിചാരിക്കണ്ട. വിവരമറിയും’ എന്നും രാമചന്ദ്രന്‍ പോസ്റ്റിട്ടിരുന്നു. ‘തമിഴ് റോക്കേഴ്‌സ് അഡ്മിന്റെ നമ്പര്‍ ആരുടെയെങ്കിലും കയ്യിലുണ്ടോ? ഏതായാലും ജയിലിലല്ലേ. 28ന് ഒരു പണിയുണ്ട്. സഹമുറിയന്റെ പള്ളക്ക് കുത്താനാണേ…’ എന്ന പോസ്റ്റ് ആണ് പൈറസിയെ പ്രോത്സാഹിപ്പിക്കുന്നതാണെന്ന് സൂചിപ്പിക്കുന്നത്. സെപ്റ്റംബര്‍ 14നായിരുന്നു ഈ പോസ്റ്റ്.
