മിന്നലാക്രമണത്തില്‍ അവര്‍ വിറച്ചു; ഒന്നും മിണ്ടാനാകാതായി അവര്‍ക്ക്, വെളിപ്പെടുത്തലുമായി ലഫ്റ്റനന്റ് ജനറല്‍ ഹൂഡ
പാക്കിസ്ഥാനെതിരെ ഇന്ത്യന്‍ സേന നടത്തിയ മിന്നലാക്രമണത്തിന് ഒരുവയസ് തികയാനിരിക്കെ കൂടുതല്‍ വെളിപ്പെടുത്തലുകളുമായി ലഫ്റ്റനന്റ് ജനറല്‍ ഡി.എസ്. ഹൂഡ. 2016 ജൂണ്‍ പതിനഞ്ചിനുശേഷം മ്യാന്‍മറിനു സമീപം ഒട്ടേറെ ആക്രമണങ്ങള്‍ നടന്നിരുന്നു. ഈ സമയത്തു പാക്കിസ്ഥാന്‍ പ്രകോപനപരമായ പ്രസ്താവനകള്‍ പലപ്പോഴും നടത്തിയിരുന്നു.
ഇന്ത്യയുടെ തിരിച്ചടിക്കു മറുപടി നല്‍കാന്‍ കഴിയുമെന്നും അവര്‍ വെല്ലുവിളിച്ചിരുന്നു. ഇതോടെയാണു മിന്നലാക്രമണമെന്ന തീരുമാനത്തിലെത്തിയത്. ഒരിക്കല്‍ മിന്നലാക്രമണം നടത്തിയാല്‍ അവര്‍ മിണ്ടാതിരിക്കുമെന്നു കണക്കുകൂട്ടി. അങ്ങനെ തന്നെ നടന്നതാണു ഞങ്ങളുടെ വിജയം ഹൂഡ പറഞ്ഞു.
മിന്നലാക്രമണത്തിനായി വന്‍ തയാറെടുപ്പുകളാണു നടത്തിയത്. ആരും പരുക്കേല്‍ക്കാതെ തിരിച്ചെത്തണമെന്ന ലക്ഷ്യത്തോടെ കമാന്‍ഡോകള്‍ക്ക് ഒട്ടേറെത്തവണ പരിശീലനം നല്‍കി. പരുക്കേല്‍ക്കാതെ തിരിച്ചെത്തണമെന്നു പറയുന്നതു മണ്ടത്തരമാണ്. ഇത്രയും വലിയ ആക്രമണം നടത്തുമ്പോള്‍ അപകടങ്ങളുണ്ടാകരുതെന്ന് ആവശ്യപ്പെടുന്നതു ശരിയല്ല.
ആളപായമുണ്ടാകുന്നതിനുള്ള സാധ്യത കൂടുതലാണ്. എന്നാല്‍ അത്തരത്തിലൊരു സാഹചര്യം ഒഴിവാക്കുകയായിരുന്നു ഞങ്ങളുടെ പ്രധാന ലക്ഷ്യം. അതില്‍ ഞങ്ങള്‍ വിജയിക്കുകയും ചെയ്തു. ഒരു സൈനികനു പോലും യാതൊന്നും സംഭവിക്കാതെ അവര്‍ തിരിച്ചെത്തി. ഏതെങ്കിലും തരത്തിലുള്ള അപകടങ്ങള്‍ സംഭവിച്ചാല്‍ രക്ഷാപ്രവര്‍ത്തനം നടത്തുന്നതിനായി ഹെലിക്കോപ്റ്ററുകള്‍ തയാറാക്കി നിര്‍ത്തിയിരുന്നു. ഇതിനായി ഒട്ടേറെ പദ്ധതികളാണു തയാറാക്കിയിരുന്നത്.
അത്തരത്തിലൊരു അപകടമുണ്ടായാല്‍ അതില്‍നിന്ന് എങ്ങനെ രക്ഷപെടാം, എന്തൊക്കെ പ്രശ്‌നങ്ങളാണ് ഉണ്ടാകാന്‍ സാധ്യത അങ്ങനെ പലകാര്യങ്ങളെക്കുറിച്ചു ചര്‍ച്ച ചെയ്തിരുന്നു. ആകാശമാര്‍ഗത്തിലൂടെ വേണോ അതോ അതിര്‍ത്തിയില്‍നിന്നു കൂടുതല്‍ സൈനികരെ അയയ്ക്കണമോയെന്നുവരെ ചിന്തിച്ചു.
അങ്ങനെയൊരു രക്ഷപ്പെടുത്തലിനായി എപ്പോഴും തയാറായിരുന്നു ഇന്ത്യന്‍ സേന. പാക്കിസ്ഥാനില്‍ നടത്തിയ ഈ മിന്നലാക്രമണത്തിനു തങ്ങള്‍ ദൃക്‌സാക്ഷികളായിരുന്നു. വിഡിയോ സ്ട്രീമിങ്ങിലൂടെ എല്ലാം തല്‍സമയം കാണുന്നുണ്ടായിരുന്നുവെന്നും ഹൂഡ പറഞ്ഞു.
പാക്ക് സേനയ്‌ക്കെതിരെ ഇന്ത്യന്‍ സേന ശക്തമായി ആക്രമണങ്ങള്‍ നടത്തിക്കൊണ്ടിരിക്കവേ ഒരു ജവാനു പരുക്കേറ്റതായി വിവരം ലഭിച്ചിരുന്നു. എന്നാല്‍ പാക്ക് തിരിച്ചടിയില്‍ ആയിരുന്നില്ല അതുണ്ടായത്. അതിര്‍ത്തിയില്‍ ഇന്ത്യന്‍ പ്രദേശത്ത് കുഴിച്ചിട്ടിരുന്ന മൈന്‍ പൊട്ടിത്തെറിച്ചതിനെ തുടര്‍ന്നാണ് അത്തരത്തിലൊരു അപകടമുണ്ടായത്.
പാക്കിസ്ഥാനില്‍നിന്നുള്ള തിരിച്ചടികളില്‍ ഇന്ത്യന്‍ ഭാഗത്ത് ആര്‍ക്കും ഒന്നും സംഭവിച്ചില്ല. അതേസമയം, മിന്നലാക്രമണത്തിലെ വിജയം ഇന്ത്യ ആഘോഷിക്കുന്നതിനിടെ ഒരാക്രമണമുണ്ടാകുമോയെന്നു ഞങ്ങള്‍ ഭയന്നിരുന്നു.
എന്നാല്‍ മിന്നലാക്രമണമേ ഉണ്ടായിട്ടില്ലെന്ന നിലപാടാണു പാക്കിസ്ഥാനെടുത്തത്. അതേസമയം, പാക്ക് തിരിച്ചടി നേരിടുന്നതിനായി ഇന്ത്യ തയാറെടുത്തിരുന്നു. മിന്നലാക്രമണമുണ്ടായ ഷോക്കില്‍ അവര്‍ക്കു യാതൊന്നും പ്രതികരിക്കാന്‍ സാധിക്കാതെയിരുന്നതാകാമെന്നും ഹൂഡ പറഞ്ഞു.
