‘നാളെ, കാലം നമുക്ക് മാപ്പുതരില്ല. കാഴ്ചയുടെ നീതി പുലരട്ടെ;” രാമാലീലക്ക് പിന്തുണയറിയിച്ച് മഞ്ജു വാര്യര്‍
കൊച്ചി: ദിലീപ് ചിത്രം രാമാലീലയുടെ റിലീസിനെ അനുകൂലിച്ചും പ്രതികൂലിച്ചും അഭിപ്രായമുയരവെ രാമലീലയ്ക്ക് പിന്തുണയുമായി നടി മഞ്ജു വാരിയര്‍. സിനിമ തിയറ്ററിലെത്തിക്കാനും അത് പ്രേക്ഷകന്‍ കാണണമെന്ന് ആഗ്രഹിക്കാനും എല്ലാവര്‍ക്കും അവകാശമുണ്ട്. അതിനെ നിഷേധിക്കാന്‍ നമുക്ക് അധികാരമില്ലെന്നും സമൂഹമാധ്യമത്തിലെ കുറിപ്പിലൂടെ അറിയിച്ചാണ് മഞ്ജു വാരിയര്‍ രംഗത്തെത്തിയിരിക്കുന്നത്..
നടി ആക്രമിക്കപ്പെട്ട സംഭവത്തില്‍ പോലീസ് അറസ്റ്റ് ചെയ്ത ദിലീപ് പ്രധാന വേഷത്തിലെത്തുന്ന ചിത്രത്തിന്റെ റിലീസ് നിരവധി തവണ മുടങ്ങുകയും നീട്ടി വക്കുകയും ചെയ്തു. ഒടുവില്‍ ഈ മാസം 28ന് ചിത്രം റിലീസ് ചെയ്യുമെന്ന് രാമാ ലീലയുടെ അണിയറ പ്രവത്തകര്‍ പ്രഖ്യാപിച്ചതിനു പിന്നാലെ മഞ്ജുവിന്റെ ‘ഉദാഹരണം സുജാത’ എന്ന ചിത്രവും ഈ മാസം 28-നു റിലീസ് ചെയ്യുമെന്ന് ചിത്രത്തിന്റെ അണിയറ പ്രവര്‍ത്തകരും അറിയിച്ചു. യഥാര്‍ത്ഥ ‘താരയുദ്ധം’ എന്ന തരത്തില്‍ മഞ്ജുവിന്റെയും ദിലീപിന്റെയും ആരാധകര്‍ തമ്മിലുള്ള മത്സരം തന്നെ ഈ സ്ഥിതി ഉണ്ടാക്കി.
അതെ സമയം രാമാലീല ബഹിഷ്‌കരിക്കണമെന്ന ആഹ്വാനം പലയിടത്തുനിന്നും ഉയരുകയുണ്ടായി. ചിത്രം റിലീസ് ചെയുന്ന തിയറ്റര്‍ കത്തിക്കണമെന്നുവരെ അഭിപ്രായമുയര്‍ന്നു. രാമാ ലീലയുടെ റിലീസ് ദിവസം സിനിമയിലെ വനിതാ കൂട്ടായ്മയും പണിമുടക്ക് നടത്തി പ്രതിഷേധം സംഘടിപ്പിക്കുമെന്ന നിലവരെ കാര്യങ്ങളെത്തി നില്‍ക്കുമ്പോഴാണ് മഞ്ജുവാര്യര്‍ രാമാലീലേക്കു പിന്തുണയുമായി എത്തിയിരിക്കുന്നത്.
”വ്യക്തിപരമായ വിയോജിപ്പുകളും എതിര്‍പ്പുകളും കാണിക്കേണ്ടത് സിനിമയോടല്ല. ഒരു സിനിമയും ഒരാളുടേത് മാത്രമല്ല. സിനിമ ഒരാളല്ല, ഒരുപാടുപേരാണ്. അവര്‍ അതില്‍ നിക്ഷേപിക്കുന്നത് പണമോ അധ്വാനമോ സര്‍ഗ്ഗവൈഭവമോ മാത്രമല്ല. പ്രതിഫലം വാങ്ങി പിരിയുന്നതോടെ തീരുന്നതല്ല ആ ബന്ധം.
സിനിമ തീയറ്ററിലെത്തിക്കാനും അത് പ്രേക്ഷകന്‍ കാണണമെന്ന് ആഗ്രഹിക്കാനും അണിയറക്കാര്‍ക്കെല്ലാം അവകാശമുണ്ട്. അതിനെ നിഷേധിക്കാന്‍ ആര്‍ക്കും അധികാരമില്ല. അങ്ങനെ ചെയ്താല്‍ അത് സിനിമയോടു ചെയ്യുന്ന അനീതിയാണ്. നാളെ, കാലം നമുക്കു മാപ്പുതരില്ല. ‘രാമലീല’ പ്രേക്ഷകര്‍ കാണട്ടെ. കാഴ്ചയുടെ നീതി പുലരട്ടെ”- മഞ്ജു പറഞ്ഞു.
മഞ്ജു വാരിയരുടെ കുറിപ്പിന്റെ പൂര്‍ണരൂപം:
”ഇത് ഒരു ഉദാഹരണമാകരുത്. ‘ഉദാഹരണം സുജാത’ ഈ മാസം 28ന് തീയറ്ററുകളിലെത്തുകയാണ്. ഏറെ ആസ്വദിച്ചു ചെയ്ത സിനിമയാണിത്. സുജാതയായിരുന്ന ഓരോ നിമിഷവും ഓരോ അനുഭവമായിരുന്നു. അവളെ നിങ്ങള്‍ക്കും ഇഷ്ടമാകുമെന്ന് പ്രതീക്ഷിക്കുന്നു. ചാര്‍ലിക്ക് ശേഷം മാര്‍ട്ടിന്‍ പ്രക്കാട്ടും ജോജുജോര്‍ജും ചേര്‍ന്നു നിര്‍മിക്കുന്ന ഈ ചിത്രത്തിന്റെ സംവിധാനം ഫാന്റം പ്രവീണാണ്. ചിത്രീകരണത്തില്‍ ഞങ്ങള്‍ക്കൊപ്പം നിന്ന തിരുവനന്തപുരത്തിന് പ്രത്യേകിച്ച് ചെങ്കല്‍ച്ചൂള നിവാസികള്‍ക്ക് ഹൃദയംനിറഞ്ഞ നന്ദി.
സുജാതയ്ക്ക് തൊട്ടുകാണിക്കാന്‍ സ്നേഹത്തിന്റെ ഉദാഹരണങ്ങളൊരുപാട് തന്നു, നിങ്ങള്‍. കോട്ടണ്‍ഹില്‍ സ്‌കൂളിലെയും അട്ടക്കുളങ്ങര സ്‌കൂളിലെയും അധ്യാപകരുടെയും വിദ്യാര്‍ഥികളുടെയും സഹകരണവും എടുത്തുപറയേണ്ടതാണ്. എല്ലാവരെയും ഓര്‍ക്കുന്നു… സുജാത പ്രേക്ഷകരുടെയും പ്രിയപ്പെട്ടവളായി മാറുമെന്നാണു പ്രതീക്ഷ.
‘ഉദാഹരണം സുജാത’യ്ക്കൊപ്പം റിലീസ് ചെയ്യുന്ന മറ്റൊരു ചിത്രമാണ് ‘രാമലീല’. ഈ സിനിമ ബഹിഷ്‌കരിക്കണമെന്ന ആഹ്വാനം പലയിടത്തുനിന്നും ഉയരുന്നുണ്ട്. തിയറ്റര്‍ കത്തിക്കണമെന്ന ആക്രോശത്തില്‍വരെയെത്തി അത്. പക്ഷേ ആ നിലപാട് ദൗര്‍ഭാഗ്യകരമാണെന്ന് പറയട്ടെ. വ്യക്തിപരമായ വിയോജിപ്പുകളും എതിര്‍പ്പുകളും കാണിക്കേണ്ടതു സിനിമയോടല്ല. ഒരു സിനിമയും ഒരാളുടേതു മാത്രമല്ല. സിനിമ ഒരാളല്ല, ഒരുപാടുപേരാണ്. അവര്‍ അതില്‍ നിക്ഷേപിക്കുന്നത് പണമോ അധ്വാനമോ സര്‍ഗ്ഗവൈഭവമോ മാത്രമല്ല. പ്രതിഫലം വാങ്ങി പിരിയുന്നതോടെ തീരുന്നതല്ല ആ ബന്ധം.
സിനിമ നന്നായി വിജയിക്കുമ്പോഴും അതു പ്രേക്ഷകര്‍ക്ക് ഇഷ്ടപ്പെട്ടു എന്നറിയുമ്പോഴുമാണ് അതിന്റെ പിന്നില്‍ പ്രവര്‍ത്തിച്ചവര്‍ യഥാര്‍ഥത്തില്‍ ആനന്ദിക്കുന്നത്. അതു പണത്തേക്കാള്‍ വലുതാണുതാനും. അതിനുവേണ്ടിയാണ് അവര്‍ രാപകലില്ലാതെ പ്രയത്നിക്കുന്നതും. സിനിമയെന്നത് അനേകം കുടുംബങ്ങളുടെ ആശ്രയമായ വ്യവസായമാണ്. ഒരുപാടുപേരുടെ അന്നവും മരുന്നും പാഠപുസ്തകവുമെല്ലാമാണ്. സിനിമയെ തീയറ്ററുകളില്‍നിന്ന് അകറ്റിയാല്‍ ഈ വ്യവസായത്തില്‍ നിക്ഷേപിക്കാന്‍ നിര്‍മാതാക്കളുണ്ടാകില്ല. അതോടെ തകരുന്നത് ഒട്ടേറെ കുടുംബങ്ങളും സ്വപ്നങ്ങളുമാണ്. അത് സംഭവിച്ചുകൂടാ.
‘രാമലീല’, ടോമിച്ചന്‍ മുളകുപാടം എന്ന നിര്‍മാതാവിന്റെ കോടിക്കണക്കിനു രൂപയുടെ നിക്ഷേപമാണ്. അതുപോലെ വര്‍ഷങ്ങളായി സിനിമയെ മാത്രം മനസ്സിലിട്ടുനടക്കുന്ന അരുണ്‍ഗോപി എന്ന നവാഗത സംവിധായകന്റേതു കൂടിയാണ്. അതിലെ അഭിനേതാക്കളുടെ മുഖങ്ങള്‍ക്കു നേരെ പ്രകാശം പ്രതിഫലിപ്പിച്ച, അവര്‍ക്കായി വച്ചുവിളമ്പിയ ക്രഡിറ്റ് കാര്‍ഡില്‍പോലും പേരുവരാത്തവരുടേയുമാണ്. സിനിമ തിയറ്ററിലെത്തിക്കാനും അത് പ്രേക്ഷകന്‍ കാണണമെന്ന് ആഗ്രഹിക്കാനും ഇവര്‍ക്കെല്ലാം അവകാശമുണ്ട്. അതിനെ നിഷേധിക്കാന്‍ നമുക്ക് അധികാരമില്ല. അങ്ങനെ ചെയ്താല്‍ അതു സിനിമയോട് ചെയ്യുന്ന അനീതിയാണ്. നാളെ, കാലം നമുക്ക് മാപ്പുതരില്ല. ‘രാമലീല’ പ്രേക്ഷകര്‍ കാണട്ടെ…കാഴ്ചയുടെ നീതി പുലരട്ടെ…
