യുവതിയുടെ കഴുത്തില്‍ കയര്‍മുറുക്കി ആഭരണങ്ങള്‍ കവര്‍ന്നു; സംഭവം കോട്ടയം നഗരമധ്യത്തില്‍
കോട്ടയം നഗരത്തില്‍ പട്ടാപ്പകല്‍ യുവതിയുടെ കഴുത്തില്‍ കയര്‍മുറിക്കി 10 പവന്‍ കവര്‍ന്നെടുത്തു. കുമാരനല്ലൂര്‍ നീലിമംഗലം പാലത്തിന് അടുത്തായിരുന്നു നടുക്കിയ സംഭവം. നീലിമംഗലത്ത് അക്വേറിയം കടയിലെ ജീവനക്കാരി ഉഷയുടെ സ്വര്‍ണാഭരണമാണ് കവര്‍ന്നത്.
ശനിയാഴ്ച ഉച്ചക്ക് 1.30 ന് ആയിരുന്നു സംഭവം. കടയിലേക്കുവന്ന യുവാവ് കഴുത്തില്‍ കയര്‍മുറുക്കി ശ്വാസംമുട്ടിച്ച ശേഷം സ്വര്‍ണം ഊരിവാങ്ങുകയായിരുന്നെന്ന് ഉഷ പറയുന്നു.
തുടര്‍ന്ന് യുവാവ് അപ്രത്യക്ഷനായ ശേഷം ഉഷ കട ഉടമയെ ഫോണില്‍ വിവരം അറിയിച്ചു. കട ഉടമയെത്തി ഉഷയെ ആശുപത്രിയില്‍ പ്രവേശിപ്പിക്കുകയായിരുന്നു. എന്നാല്‍ ഉഷയുടെ മൊഴിയില്‍ വൈരുദ്ധ്യം തോന്നിയതിനാല്‍ ഇവരെ പോലീസ് വീണ്ടും ചോദ്യം ചെയ്തു. കേസെടുത്ത് അന്വേഷണം ആരംഭിച്ചിട്ടുണ്ട്.
