ആഭ്യാസ പ്രകടനത്തിനിടെ സൈനിക വിമാനം തകര്‍ന്നു വീണു; വീഡിയോ പുറത്ത്, പൈലറ്റിന് ദാരുണാന്ത്യം..
ആയിരക്കണക്കിന് ആളുകള്‍ നോക്കിനില്‍ക്കെ വ്യോമാഭ്യാസത്തില്‍ പങ്കെടുക്കുകയായിരുന്ന സൈനിക വിമാനം തകര്‍ന്നുവീണ് പൈലറ്റ് മരിച്ചു. ഇറ്റലിയുടെ തലസ്ഥാനമായ റോമില്‍ നിന്ന് 110 കിലോമീറ്റര്‍ അകലെ ടെറാസിനയിലാണു സംഭവം.
ഇറ്റാലിയന്‍ വ്യോമസേന ഉപയോഗിക്കുന്ന യൂറോ ഫൈറ്റര്‍ ജെറ്റുകളിലൊന്നാണ് സൈനികാഭ്യാസത്തിനിടെ കടലില്‍ തകര്‍ന്നു വീണത്. അപകടത്തിനു തൊട്ടുപിന്നാലെ രക്ഷാപ്രവര്‍ത്തനം ആരംഭിച്ചെങ്കിലും പൈലറ്റിന്റെ ജീവന്‍ രക്ഷിക്കാനായില്ല. മൃതദേഹം കണ്ടെടുത്തതായി ഇറ്റാലിയന്‍ എയര്‍ഫോഴ്‌സ് സ്ഥിരീകരിച്ചു.
അപകടത്തിനു തൊട്ടുമുന്‍പായി വിമാനം ആകാശത്ത് ഡൈവ് ചെയ്യുന്നതിന്റെ വിഡിയോ ദൃശ്യങ്ങള്‍ പുറത്തുവന്നിട്ടുണ്ട്. ഇതിനു തൊട്ടുപിന്നാലെയാണ് വന്‍ ശബ്ദത്തോടെ വിമാനം കടലിലേക്കു കൂപ്പുകുത്തിയത്. അപകടത്തിന്റെ കാരണം ഇനിയും വ്യക്തമായിട്ടില്ല. സംഭവത്തേക്കുറിച്ച് അന്വേഷണം പ്രഖ്യാപിച്ചിട്ടുണ്ട്.
