ഭൂകമ്പത്തില്‍ ജീവന്‍ നഷ്ടമായ ആരാധകന്റെ കുടുംബത്തിന്റെ ദുഃഖത്തില്‍ പങ്കുചേര്‍ന്ന് ക്രിസ്റ്റ്യാനോ റൊണാള്‍ഡോ
മാഡ്രിഡ്: മെക്‌സിക്കോയില്‍ കഴിഞ്ഞ ചൊവ്വാഴ്ചയുണ്ടായ ഭൂകമ്പത്തില്‍ നിരവധി ജീവനുകളാണ് പൊലിഞ്ഞത്. നിരവധിപേര്‍ക്ക് വീടും വാഹഞങ്ങളും നഷ്ടമായി. ദുരിതത്തില്‍ നിന്നും മെക്‌സിക്കന്‍ ജനത ഇപ്പോഴും കര കയറിയിട്ടില്ല. എന്നാല്‍ റയല്‍ മാഡ്രിഡിന്റെ സൂപ്പര്‍ താരം ക്രിസ്റ്റിയാനോ റൊണാള്‍ഡോയുടെ ആരാധകനായ സാന്റിയാഗോ ഭൂകമ്പത്തില്‍ മരണമടയുകയുണ്ടായി. തന്റെ ആരാധകന്റെ മരണത്തില്‍ തനിക്കു വിഷമമുണ്ടെന്നറിയിക്കുന്ന റൊണാള്‍ഡോയുടെ ഫോട്ടോക്ക് സമൂഹ മാധ്യമങ്ങളില്‍ വലിയ സ്വീകാര്യതയാണ് ലഭിക്കുന്നത്.
സാന്റിയാഗോയുടെ വേര്‍പാടില്‍ ദുഖിതരായിരിക്കുന്ന കുടുംബത്തിന് റൊണാള്‍ഡോ ആശ്വാസ വാചകങ്ങള്‍ അറിയിച്ചു. ഭൂകമ്പത്തില്‍ മരിച്ച ആരാധകന് സാന്റിയാഗോയുടെ കുടുംബത്തെയും ഭൂകമ്പത്തിനിരയായ മറ്റു കുടുംബങ്ങളെയും ഞാന്‍ ആശ്ലേഷിക്കുന്നു എന്ന ഹൃദയസ്പര്‍ശിയായ സന്ദേശമയച്ചാണ് റൊണാള്‍ഡോ സ്‌നേഹം പ്രകടിപ്പിച്ചത്. ട്വിറ്ററിലൂടെയാണ് റൊണാള്‍ഡോ ആരാധകന് സന്ദേശമയച്ചത്.
റയലിന്റെ ജഴ്‌സിയില്‍ എന്റെ ഒന്നാം നമ്ബര്‍ ആരാധകന് സാന്റിയാഗോയ്ക്ക് എന്നെഴുതിക്കൊണ്ടാണ് ക്രിസ്റ്റ്യാനോയുടെ സന്ദേശം. ‘വേദനാജനകമായ ഈ നിമിഷത്തില്‍ സാന്റിയാഗോയുടെ കുടുംബത്തെയും ഭൂകമ്പത്തിനിരയായ മറ്റു കുടുംബങ്ങളെയും ഞാന്‍ ആശ്ലേഷിക്കുന്നു.’
കഴിഞ്ഞ ചൊവ്വാഴ്ചയുണ്ടായ ഭൂകമ്പത്തിലാണ് സാന്റിയാഗോ കൊല്ലപ്പെട്ടത്. സാന്റിയാഗോയുടെ ബന്ധുക്കള്‍ റൊണാള്‍ഡോയെ മരണവിവരം അറിയിച്ചിരുന്നു. റിക്ടര്‍ സ്‌കെയിലില്‍ 7.1 തീവ്രത രേഖപ്പെടുത്തി. ഭൂകമ്പത്തില്‍ നിരവധി പേരാണ് കൊല്ലപ്പെട്ടത്. കഴിഞ്ഞ ശനിയാഴ്ച അത്‌ലറ്റികോ മാഡ്രിഡ് 50,000 യൂറോ മെക്‌സിക്കന്‍ ദുരിന്തബാധിതര്‍ക്കായി നല്‍കിയിരുന്നു.
