ചാമ്പ്യന്‍സ് ലീഗ് ഗാനാലാപത്തിലും ഗോളടിച്ച് ക്രിസ്റ്റ്യാനോ
മാഡ്രിഡ്: അന്താരാഷ്ട്ര ഫുട്‌ബോള്‍ മത്സരങ്ങള്‍ക്ക് മുന്‍പുള്ള ദേശീയഗാനാലാപനം ഒരു പ്രത്യേക വികാരമാണ്. രാജ്യത്തോടുള്ള സ്‌നേഹം നെഞ്ചിലേറ്റി ദേശിയ ഗാനം ഏറ്റുചൊല്ലുന്ന ചില താരങ്ങള്‍ ആവേശത്തിന്റെ നിമിഷങ്ങളാണ് കാണികള്‍ക്ക് സമ്മാനിക്കാറുള്ളത്. എന്നാല്‍ ക്ലബ് മത്സരങ്ങള്‍ക്ക് ദേശീയ ഗാനാലാപനം പതിവില്ല. ക്ലബുകളുടെയോ ടൂര്‍ണമെന്റുകളുടെയോ ഗാനങ്ങളാണ് ആലപിക്കാറുള്ളത്.
എന്നാല്‍, ദേശീയ ഗാനം ആലപിക്കുന്ന അതേ വൈകാരികതയോടെ ടൂര്‍ണമെന്റ് ഗാനം ആലപിച്ച സൂപ്പര്‍ താരം ഇപ്പോള്‍ ആരാധകാരുടെ മനം കവര്‍ന്നിരിക്കുകയാണ്.
When you love the #UCL so much that you sing the anthem 😀🎶@Cristiano 👏👏👏 pic.twitter.com/Evt2xkOj9t
— Champions League (@ChampionsLeague) October 18, 2017
റയല്‍ മാഡ്രിഡിന്റെ സൂപ്പര്‍താരം ക്രിസ്റ്റ്യാനോ റൊണാള്‍ഡോയാണ് ടൂര്‍ണമെന്റ് ഗാനം ആലപിച്ചു കൊണ്ട് ആരാധകഹൃദയത്തില്‍ ഇടം നേടിയിരിക്കുന്നത്.
ചൊവ്വാഴ്ച്ച നടന്ന ചാമ്പ്യന്‍സ് ലീഗ് ഫുട്‌ബോളില്‍ ടോട്ടനത്തിനെതിരായ ഗ്രൂപ്പ് മത്സരത്തിനിടയിലായിരുന്നു എല്ലാവരുടെയും ഹൃദയം കീഴടക്കിയ ക്രിസ്റ്റ്യാനോയുടെ പ്രവൃത്തി. മത്സരം തുടങ്ങുന്നതിന് മുന്‍പ് ചാമ്ബ്യന്‍സ് ലീഗ് ഗാനത്തിനായി എല്ലാവരും അണിനിരന്നു. മറ്റെല്ലാ താരങ്ങളും പാട്ട് കേട്ട് നിന്നപ്പോള്‍ ദേശീയ ഗാനം കേട്ട പോലെയായിരുന്നു ക്രിസ്റ്റ്യാനോയുടെ പ്രതികരണം. പാട്ടിനൊപ്പം എല്ലാം മറന്ന് ക്രിസ്റ്റിയാനോയും ടൂര്‍ണമെന്റ് ഗാനം പാടി.
ഈ വീഡിയോ ഇപ്പോള്‍ സോഷ്യല്‍ മീഡിയയില്‍ വന്‍ ഹിറ്റാണ്. നിരവധി ആരാധകാരണ് ക്രിസ്റ്റ്യാനോയെ അഭിനന്ദിച്ച് ട്വീറ്റ് ചെയ്തത്. സ്വന്തം രാജ്യത്തെ സ്‌നേഹിക്കുന്നതു പോലെ ക്രിസ്റ്റ്യാനോയ്ക്ക് ചാമ്ബ്യന്‍സ് ലീഗിനോടും സ്‌നേഹമുണ്ടെന്നാണ് ആരാധകരുടെ കണ്ടെത്തല്‍.
