ഗുജറാത്തിൽ ബിജെപി അധികാരം നിലനിർത്തുമെന്ന് സർവെ ഫലം; മോദിയുടെ വ്യക്തിപ്രഭാവം ബിജെപിയെ വീണ്ടും അധികാരത്തിലെത്തിക്കും
അഹമ്മദാബാദ്: നോട്ട് നിരോധനം, ജി.എസ്.ടി തുടങ്ങി നിരവധി വിഷയങ്ങളില്‍ കേന്ദ്രസര്‍ക്കാരിനെതിരേ ഭരണവിരുദ്ധ വികാരം നിലനില്‍ക്കുമ്പോഴും ഗുജറാത്തില്‍ നടക്കാനിരിക്കുന്ന നിയമസഭാ തിരഞ്ഞെടുപ്പില്‍ ബി.ജെ.പി അധികാരം നിലനിര്‍ത്തുമെന്ന് അഭിപ്രായ സര്‍വേ. ഇന്ത്യാടുഡെആക്‌സിസ് മൈ ഇന്ത്യ നടത്തിയ സര്‍വേയിലാണ് ഗുജറാത്തില്‍ ബി.ജെ.പി തന്നെ തെരഞ്ഞെടുക്കപ്പെടുമെന്ന് പ്രവചിച്ചിരിക്കുന്നത്. തിരഞ്ഞെടുപ്പിനോടനുബന്ധിച്ച് ഗുജറാത്തില്‍ ഒരു മാസത്തോളമായി സംഘടിപ്പിച്ച സര്‍വെയിലാണ് ഈ പ്രവചനം.
ഗുജറാത്തിലെ 182 നിയമസഭാമണ്ഡലങ്ങളില്‍ 115 മുതല്‍ 125 വരെ സീറ്റ് ബി.ജെ.പി നേടുമെന്നാണ് പ്രവചനം. 2012ലെ തിരഞ്ഞെടുപ്പില്‍ 60 സീറ്റ് ലഭിച്ച കോണ്‍ഗ്രസ്സിന് 57 മുതല്‍ 67 സീറ്റ് വരെ ലഭിക്കുമെന്നാണ് സര്‍വെ പറയുന്നത്. ബി.ജെ.പി 48 ശതമാനം വോട്ടും കോണ്‍ഗ്രസ് 38 ശതമാനം നേടും. സര്‍വേയില്‍ പങ്കെടുത്ത 34 ശതമാനം പേര്‍ വിജയ് രൂപാനി തന്നെ മുഖ്യമന്ത്രിയാകണമെന്ന് അഭിപ്രായപ്പെട്ടപ്പോള്‍ 19 ശതമാനം കോണ്‍ഗ്രസ് എം.എല്‍.എ ശക്തിസിങ് ഗോഹിലിനെയും 11 ശതമാനം കോണ്‍ഗ്രസ് നേതാവ് ഭരത് സിങ് സോളങ്കിയെയും പിന്തുണച്ചു.
ദളിത് നേതാവ് അല്‍പേഷ് ഠാക്കൂറിന്റെയും, ജിഗ്‌നേഷ് മേവാനിയുടേയും പിന്തുണ കോണ്‍ഗ്രസിന് കോണ്‍ഗ്രസ്സിന് ലഭിക്കുകയാണെങ്കില്‍ കൂടുതല്‍ വോട്ടുകള്‍ ലഭിക്കുമെന്നും സര്‍വെ ചൂണ്ടിക്കാട്ടുന്നുണ്ട്. കൂടാതെ പട്ട്യാധര്‍ നേതാവ് ഹര്‍ദിക് പട്ടേല്‍ കോണ്‍ഗ്രസിന് പിന്തുണ പ്രഖ്യാപിക്കുകയാണെങ്കില്‍ വോട്ട് ശതമാനം വീണ്ടും ഉയര്‍ത്തി നേട്ടമുണ്ടാക്കാനാകുമെന്നും സര്‍വെ വ്യക്തമാക്കുന്നു. കഴിഞ്ഞ കുറച്ച് വര്‍ഷമായി ഗുജറാത്തിലെ പട്ട്യാധര്‍ വിഭാഗത്തില്‍ വലിയ സ്വാധീനമാണ് ഹര്‍ദിക് പട്ടേലിനുള്ളത്. വോട്ട് സംഖ്യയില്‍ നിര്‍ണായക സ്വാധീനം ചെലുത്താന്‍ കഴിയുന്ന സംസ്ഥാനത്തെ പ്രബല വിഭാഗമാണ് പട്ടേല്‍മാര്‍.
സംസ്ഥാനത്ത് ബി.ജെ.പിക്കെതിരെ ഭരണ വിരുദ്ധ വികാരം നിലനില്‍ക്കുന്നുണ്ടെങ്കിലും പ്രധാനമന്ത്രി നരേന്ദ്രമോദിയുടെ വ്യക്തിപ്രഭാവം കൊണ്ട് അതിനെ മറികടക്കാന്‍ കഴിയുമെന്നാണ് വിലയിരുത്തപ്പെടുന്നത്. ജി.എസ്.ടി നടപ്പാക്കിയതിനെ സര്‍വേയില്‍ പങ്കെടുത്ത ഭൂരിഭാഗവും എതിര്‍ക്കുമ്പോഴും നരേന്ദ്രമോദിയുടെ ജന സമ്മിതിക്ക് കോട്ടം തട്ടിയിട്ടില്ലെന്നാണ് 66 ശതമാനത്തിന്റെയും അഭിപ്രായം.
