ട്വന്റി-20 യിലും വിജയമാവര്‍ത്തിക്കാനുറച്ച് ഇന്ത്യ; ഒന്നാം റാങ്കിന്റെ പെരുമ കാക്കാന്‍ ന്യുസിലാന്‍ഡും,ഇന്ത്യ-ന്യുസിലാന്‍ഡ് ആദ്യ ട്വന്റി-20 നാളെ
ദില്ലി: ആവേശകരമായ ഏകദിന മത്സരങ്ങള്‍ക്ക് ശേഷം ഇന്ത്യ ന്യുസിലാന്‍ഡ് ട്വന്റി 20 പരമ്പരക്ക് നാളെ തുടക്കം. ദില്ലിയിലെ ഫിറോസ് ഷാ കോട്‌ല സ്റ്റേഡിയത്തില്‍ രാത്രി ഏഴ് മണിക്കാണ് മത്സരം. ഏകദിന പരമ്പര 2 1 ന് സ്വന്തമാക്കിയ ഇന്ത്യ, ട്വന്റി 20 പരമ്പര ഏകപക്ഷിയമായി സ്വന്തമാക്കാം എന്ന പ്രതീക്ഷയിലാണ്. എന്നാല്‍ കെയ്ന്‍ വില്യംസന്‍ നയിക്കുന്ന ന്യൂസിലന്‍ഡ് ടീമിനെ അത്ര എളുപ്പം തോല്‍പ്പിക്കാമെന്ന് ക്യാപ്റ്റന്‍ വിരാട് കോലി പോലും കരുതുന്നുണ്ടാകില്ല.
ട്വന്റി 20 റാങ്കിംഗില്‍ ലോക ഒന്നാം നമ്പര്‍ ടീമായ ന്യൂസിലന്‍ഡ് അത്ര എളുപ്പം തോല്‍വി സമ്മതിക്കുന്നവരല്ല. റാങ്കിങ്ങില്‍ അഞ്ചാം സ്ഥാനത്തുള്ള ഇന്ത്യ ട്വന്റി20യില്‍ അത്ര മികച്ചവരാണോ എന്ന് നടക്കുന്ന മത്സരങ്ങളില്‍ കണ്ടുതന്നെ അറിയണം.
ഫാസ്റ്റ് ബൗളര്‍ ആശിഷ് നെഹ്‌റയുടെ അവസാനത്തെ അന്താരാഷ്ട്ര മത്സരം കൂടിയായിരിക്കും ദില്ലിയിലെ ട്വന്റി 20 മാച്ച്. 38കാരനായ നെഹ്‌റ ഈ മത്സരത്തോടെ വിരമിക്കല്‍ പ്രഖ്യാപിച്ചിരിക്കുകയാണ്. ആശിഷ് നെഹ്‌റ ഇപ്പോള്‍ ഇന്ത്യയ്ക്ക് വേണ്ടി ട്വന്റി 20 യില്‍ മാത്രമേ കളിക്കുന്നുള്ളൂ. ഓസ്‌ട്രേലിയയ്‌ക്കെതിരെ നാട്ടില്‍ നടക്കുന്ന പരമ്ബര കളിക്കുന്ന ഇന്ത്യന്‍ ടീമില്‍ നെഹ്‌റയും ഉണ്ടായിരുന്നു പക്ഷേ അവസാന ഇലവനില്‍ അവസരം കിട്ടിയിരുന്നില്ല.
