ഇത്രക്ക് സിംപിളാണ് ലാലേട്ടന്‍; താര ജാഡയില്ലാതെ താര രാജാവ് ആശുപത്രിയില്‍ ക്യൂ നിൽക്കുന്നു, ചിത്രങ്ങള്‍ വൈറല്‍
സിനിമ താരങ്ങള്‍ക്കിടയില്‍ താര ജാഡകളില്ലാത്തയാളാണ് മോഹന്‍ ലാല്‍ എന്നാണ് ഒട്ടേറെ സിനിമ പ്രവര്‍ത്തകരും പറയുന്നത്. സഹപ്രവര്‍ത്തകരോട് വളരെ വിനയത്തോടും, സ്‌നേഹത്തോടും ഇടപെടുന്നയാളാണ് മോഹന്‍ ലാല്‍. ആള്‍ത്തിരക്കിനിടയില്‍പ്പെട്ടാലും താര ജാഡയൊന്നും മോഹന്‍ ലാല്‍ കാണിക്കാറില്ല. അതിനുദാഹരണമാണ് ആശുപത്രിയില്‍ മറ്റുള്ളവരോടൊപ്പം ഒ.പിയില്‍ ക്യൂ നില്‍ക്കുന്ന മോഹന്‍ ലാലിന്റെ പുറത്ത് വന്ന ഈ ചിത്രം.
ചെന്നൈയിലെ അപ്പോളോ ആശുപത്രിയിലെത്തിയ മോഹന്‍ലാല്‍ ക്യൂവില്‍ നില്‍ക്കുന്ന ചിത്രമാണ് സോഷ്യല്‍ മീഡിയയില്‍ വൈറലായികൊണ്ടിരിക്കുന്നത്. ശ്രീകുമാര്‍ മേനോന്‍ സംവിധാനം ചെയ്യുന്ന ‘ഒടിയന്‍’ എന്ന ചിത്രത്തിന് വേണ്ടി രൂപ മാറ്റം വരുത്തുന്നതിന് നൂതന ശാസ്ത്രീയ ചികിത്സയ്ക്ക് എത്തിയതാണ് താരം. ക്യൂവില്‍ നില്‍ക്കുന്ന മോഹന്‍ലാലിനെ ഡോക്ടര്‍മാര്‍ പിന്നീട് കൂട്ടികൊണ്ടുപോകുകയായിരുന്നു.
സിനിമയ്ക്ക് വേണ്ടി രൂപമാറ്റം വരുത്താന്‍ ശരീരം സജ്ജമാണോ എന്നറിയാനാണ് താരം എത്തിയത്. വ്യായാമത്തിലൂടെ ഹൃദയത്തിന്റെ കാര്യക്ഷമത മനസ്സിലാക്കുന്ന പരിശോധനയായ ട്രെഡ്മില്‍ ടെസ്റ്റിനാണ് താരം വിധേയനായതെന്നും റിപ്പോര്‍ട്ടുകള്‍ പറയുന്നു.ഫ്രാന്‍സില്‍ നിന്നുള്ള സംഘമാണ് മോഹന്‍ലാലിനെ പരിശീലിപ്പിക്കാന്‍ എത്തിയിട്ടുള്ളത്. ഇതുസംബന്ധിച്ച വിവരങ്ങള്‍ ഒടിയന്‍ സിനിമയുടെ സംവിധായകന്‍ ശ്രീകുമാര്‍ മേനോനാണ് പങ്കുവച്ചത്.
