ന്യൂയോര്‍ക്കില്‍ ആള്‍ക്കൂട്ടത്തിനിടയിലേക്ക് ട്രക്ക് ഓടിച്ചു കയറ്റി ആക്രമണം; എട്ടു മരണം; 11 പേര്‍ക്ക് പരിക്ക്
ന്യൂയോര്‍ക്ക്: ന്യൂയോര്‍ക്കിലെ ലോവര്‍ മാന്‍ഹാട്ടനില്‍ കാല്‍നടക്കാര്‍ക്കും സൈക്കിള്‍യാത്രികര്‍ക്കും ഇടയിലേക്ക് അക്രമി ട്രക്ക് ഓടിച്ചു കയറ്റി. സംഭവത്തില്‍ എട്ടുപേര്‍ കൊല്ലപ്പെടുകയും 11 പേര്‍ക്ക് പരിക്കേല്‍ക്കുകയും ചെയ്തു.സംഭവത്തില്‍ 29 കാരനായ സെയ്ഫുള്ള സയ്‌പോവ് എന്നയാളെ പിടികൂടിയതായി പോലീസ് അറിയിച്ചു.ഇയാളെ വെടിവച്ച് വീഴ്ത്തിയ ശേഷം അറസ്റ്റ് ചെയ്യുകയായിരുന്നു. രണ്ടു തോക്കുകളും പോലീസ് കണ്ടെടുത്തു.
പ്രാദേശികസമയം വൈകിട്ടു 3.15ന് ആയിരുന്നു സംഭവം. വേള്‍ഡ് ട്രേഡ് സെന്റര്‍ സ്മാരകത്തിനു സമീപമുണ്ടായത് ഭീകരാക്രമണമാണെന്നാണ് പ്രാഥമിക നിഗമനം. ഇസ്ലാമിക് സ്റ്റേറ്റ് (ഐഎസ്) ഭീകരരുടെ പതാകയും ലേഖനങ്ങളും ട്രക്കില്‍ നിന്നും പൊലീസ് കണ്ടെടുത്തെന്നാണ് റിപ്പോര്‍ട്ട്.
മരിച്ചവരില്‍ അര്‍ജന്റീനക്കാരും ഉള്‍പ്പെട്ടതായി അര്‍ജന്റീനയുടെ വിദേശകാര്യ മന്ത്രി പറഞ്ഞു. ലോവര്‍ മാന്‍ഹാറ്റനില്‍ ഹഡ്‌സന്‍ നദിയോടു ചേര്‍ന്നുള്ള തെരുവുകള്‍ പൊലീസ് അടച്ചു. ബോംബ് സ്‌ക്വാഡ് സ്ഥലത്തെത്തി ട്രക്ക് പരിശോധിച്ചു. സ്‌ഫോടക വസ്തുക്കളൊന്നും കിട്ടിയില്ല. നടന്നത് ഭീകരാക്രമണം ആണെന്നു മേയര്‍ ബില്‍ ഡെ ബ്ലാസിയോ സ്ഥിരീകരിച്ചു.
