ധോണിയെ ടീമില്‍ നിന്ന് ഒഴിവാക്കണമെന്ന ആവശ്യവുമായി മറ്റൊരു ഇന്ത്യന്‍ താരം കൂടി രംഗത്ത്
ട്വന്റി-20യില്‍ നിന്നും മഹേന്ദ്ര സിംഗ് ധോണിയെ ഒഴിവാക്കണമെന്ന ആവശ്യവുമായിപല മുന്‍ താരങ്ങളും നേരത്തെ രംഗത്തെത്തിയിരുന്നു. എന്നാല്‍ ക്യാപ്റ്റന്‍ വിരാട് കോഹ്ലിയും, ആശിഷ് നെഹ്‌റയും, ധോണിക്ക് പിന്തുണയുമായി എത്തി. ധോണിക്കെതിരെ വീണ്ടും വിമര്‍ശനവുമായി മറ്റൊരു മുന്‍ ഇന്ത്യന്‍ താരം കൂടി രംഗത്തെത്തിയിരിക്കുകയാണ്. മുന്‍ ഇന്ത്യന്‍ താരമായിരുന്ന ആകാശ് ചോപ്രയാണ് ധോണി ടി-20-യില്‍ നിന്ന് വിരമിക്കണമെന്ന ആവശ്യവുമായി രംഗത്തെത്തിയിരിക്കുന്നത്.
ധോണിയെ ട്വന്റി-20ക്കുള്ള ടീമില്‍ നിന്ന് ഒഴിവാക്കണം. ഗ്രൌണ്ടില്‍ അദ്ദേഹത്തിന്റെ പിടി അയയുന്ന സാഹചര്യമാണ് ഇപ്പോഴുള്ളത്. ശ്രീലങ്കയ്‌ക്കെതിരെ വരാന്‍ പോകുന്ന മത്സരങ്ങളില്‍ ഇന്ത്യന്‍ ടീം മികച്ച പ്രകടനം നടത്തും. എന്നാല്‍, ദക്ഷിണാഫ്രിക്കയെ നേരിടാന്‍ ഇറങ്ങുമ്പോള്‍ അനുകൂലസാഹചര്യമായിരിക്കില്ല ഉണ്ടാകുക എന്നും ചോപ്ര പറഞ്ഞു.
നേരത്തെ വിവിഎസ് ലക്ഷ്മണും അജിത് അഗാള്‍ക്കറും ധോണിയെ ടീമില്‍ നിന്നും ഒഴിവാക്കണമെന്ന് ആവശ്യപ്പെട്ടിരുന്നുവെങ്കിലും ഇരുവരെയും തള്ളി ടീം ക്യാപ്റ്റന്‍ വിരാട് കോഹ്ലിയടക്കമുള്ള താരങ്ങള്‍ രംഗത്തെത്തിയിരുന്നു.
