രാജമൗലിയും പറയുന്നു, അതുക്കും മേലെയാണ് ഈ ബാഹുബലി ഡാന്‍സ്; കണ്ടവര്‍ക്കും പറയാനുള്ളത് ഇത് മാത്രം, വൈറല്‍ ബാഹുബലി ഡാന്‍സ്
ബാഹുബലി എന്ന ബ്രഹ്മാണ്ഡ സിനിമയിലൂടെ ഇന്ത്യന്‍ സിനിമയെ ഞെട്ടിച്ച സംവിധായകന്‍ രാജ മൗലി വരെ ഞെട്ടിയ ഈ ഡാന്‍സ് വീഡിയോയാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ച വിഷയം.രാജമൗലിയെ ഞെട്ടിച്ചു ഡാന്‍സ് ചെയ്യുമ്പോള്‍ മനസ്സിലാകുമല്ലോ അതു വേറെ ലെവല്‍ ആണെന്ന്. ‘ഇപ്പോള്‍ കാണുന്ന നൃത്തച്ചുവടുകളെല്ലാം അതിഗംഭീരമാണ്. പക്ഷേ ഇത് അതുക്കും മേലെയാണ്… ഒരു പ്രത്യേക അനുഭൂതിയാണ്’. ഒരു ഡാന്‍സ് വിഡിയോയെക്കുറിച്ച് സംവിധായകന്‍ എസ്.എസ്. രാജമൗലി പറഞ്ഞതാണിത്.
തന്റെ ബ്രഹ്മാണ്ഡ ചിത്രം ബാഹുബലിയിലെ പാട്ടുകള്‍ കോര്‍ത്തിണക്കി ബാഹുബലിയിലെ കഥ ഡാന്‍സിന്റെ രൂപത്തില്‍ അവതരിപ്പിച്ച ഡാന്‍സ് സംഘം അക്ഷരാര്‍ത്ഥത്തില്‍ സകലരെയും അമ്പരപ്പിച്ചു. ചിത്രത്തിലെ കഥാപാത്രങ്ങളായ കട്ടപ്പയും ബാഹുബലിയുമൊക്കെ ഡാന്‍സിലുണ്ടായിരുന്നു. ജിയോ രേ ബാഹുബലി എന്ന പാട്ടിനൊപ്പം കിങ്‌സ് യുണൈറ്റഡ് എന്ന സംഘം നൃത്തം ചെയ്തത് വലിയ ശ്രദ്ധ നേടുകയാണ്. വലിയ വേദിയില്‍ കട്ടപ്പയും ബാഹുബലിയുമായി കട്ടയ്ക്ക് നിന്ന് ഇവരുടെ ഡാന്‍സ് കാണുന്നതുതന്നെ ത്രസിപ്പിക്കുന്ന അനുഭവമാണ്.
പാട്ടിന്റെ ഊര്‍ജം അതേപടി ഇവര്‍ ഉള്‍ക്കൊണ്ടിട്ടുണ്ട്. സുരേഷ് മുകുന്ദ് ആണ് നൃത്തം ചിട്ടപ്പെടുത്തിയത്. കാര്‍ത്തിക് പ്രിയദര്‍ശന്‍ ബാഹുബലിയായും രാജാ ദാസ് കട്ടപ്പയായും വേഷമിട്ടു.കീരവാണിയാണ് ഈ പാട്ടിന് ഈണമിട്ടത്. മനോജ് മുണ്ടാഷിറിന്റേതായിരുന്നു വരികള്‍. ദലേര്‍ മെഹന്ദി, സഞ്ജീവ് ചിമ്മാല്‍ഗി, രമ്യാ ബെഹറ എന്നിവരടങ്ങിയ സംഘമാണ് ഈ പാട്ട് പാടിയത്.
