മലയാളി താരം ബേസില്‍ തമ്പി ഇന്ത്യന്‍ ക്രിക്കറ്റ് ടീമില്‍
മലയാളി പേസ് ബൗളര്‍ ബേസില്‍ തമ്പി ശ്രീലങ്കയ്‌ക്കെതിരേയുള്ള ടി-ട്വന്റി ടീമില്‍ ഇടംപിടിച്ചു. ഇന്ത്യന്‍ ടീമിലെത്തുന്ന മൂന്നാമത്തെ കേരളാ പേസറും നാലാമത്തെ താരവുമാണ്‌ ബേസില്‍ തമ്പി. ഇതിനു മുന്‍പ് ടിനു യോഹന്നാന്‍, ശ്രീശാന്ത്, സഞ്ജു സാംസണ്‍ എന്നിവരാണ് ഇന്ത്യന്‍ ടീമില്‍ മുമ്പ് ഇടംനേടിയ മലയാളി താരങ്ങള്‍. ശ്രീലങ്കയ്‌ക്കെതിരേ മൂന്ന് ടി-ട്വന്റികളടങ്ങിയ പരമ്പര ഈ മാസമാണ് നടക്കുന്നത്. ക്യാപ്റ്റന്‍ വിരാട് കോലിക്ക് വിശ്രമം നല്‍കിയിട്ടുണ്ട്. പകരം രോഹിത് ശര്‍മ്മയാണ് നായകന്‍.
നേരത്തെ ന്യൂസിലന്‍ഡിനെതിരേയുള്ള ഇന്ത്യന്‍ ‘എ’ ടീമില്‍ ഇടംപിടിച്ച ബേസില്‍ തമ്പി മികച്ച പ്രകടനമാണ് കാഴ്ചവെച്ചത്. രഞ്ജിയിലെ മികവും താരത്തിനു ഇന്ത്യന്‍ ക്യാപ് അണിയാന്‍ തുണയായി. ശ്രീലങ്കയ്‌ക്കെതിരേ ടെസ്റ്റ്-ഏകദിന മത്സങ്ങള്‍ക്ക് ശേഷമാണ് ടി-ട്വന്റി. നിലവില്‍ ശ്രീലങ്കയ്‌ക്കെതിരെയുള്ള മൂന്നാം ടെസ്റ്റ് ഡല്‍ഹിയില്‍ നടന്നുകൊണ്ടിരിക്കുകയാണ്.
