സണ്ണി ലിയോണ്‍ മലയാള സിനിമാ ലോകത്തേക്ക്; കാലങ്ങളായി താന്‍ ആഗ്രഹിച്ച വേഷമെന്ന് നടി
ബോളിവുഡ് നടി സണ്ണി ലിയോണ്‍ മലയാള സിനിമാ ലോകത്തേക്ക്. തമിഴ് സംവിധായകനായ വി.സി വടിവുടയാന്‍ കഥ എഴുതി സംവിധാനം ചെയ്യുന്ന ചിത്രത്തിലൂടെയാണ് സണ്ണിയുടെ മലയാളസിനിമ രംഗപ്രവേശം. സ്റ്റീഫ്സ് കോര്‍ണര്‍ ഫിലിംസിന് വേണ്ടി, പൊന്‍സെ സ്റ്റിഫനാണ് ചിത്രത്തിന്റെ നിര്‍മാണം. ബാഹുബലി, യന്തിരന്‍ 2 സിനിമകള്‍ക്ക് വേണ്ടി ഗ്രാഫിക്സ് ചെയ്ത ടീമാണ് ഈ ചിത്രത്തിന്റേയും ഗ്രാഫിക്സ് ചെയ്യുന്നത്. ചിത്രത്തിന് വേണ്ടി സണ്ണി ലിയോണ്‍ നൂറ്റമ്പത് ദിവസത്തെ ഡേറ്റ് കൊടുത്തു കഴിഞ്ഞെന്ന് അണിയറപ്രവര്‍ത്തകര്‍ അറിയിച്ചു.
ചാലക്കുടിയില്‍ പ്രാധാന ലൊക്കേഷന്‍ നിശ്ചയിച്ചിരിക്കുന്ന സിനിമയുടെ ചിത്രീകരണം ഫെബ്രുവരിയില്‍ ആരംഭിക്കും. ചിത്രത്തിന്റെ പേര് ഇതുവരെ പുറത്തുവിട്ടിട്ടില്ല. മലയാളത്തിന് പുറമെ തമിഴ്, തെലുങ്ക്, ഹിന്ദി ഭാഷകളിലും ചിത്രം റിലീസ് ചെയ്യും. സണ്ണിക്കൊപ്പം നാസര്‍, നവദീപ് തുടങ്ങിയവരും മറ്റു പ്രാധാന വേഷത്തിലെത്തുന്നു.
ദക്ഷിണേന്ത്യയില്‍ തനിക്ക് കൂടൂതല്‍ ആരാധകര്‍ ഉണ്ടെന്നും, അവരെ തൃപ്തിപ്പെടുത്തുന്ന സിനിമയായിരിക്കും ഇതെന്നും സണ്ണി പറയുന്നു. ഈ സിനിമ കഴിഞ്ഞ ശേഷമേ ഇനി മറ്റ് സിനിമകളില്‍ അഭിനയിക്കുന്നുള്ളു. ആദ്യമാണ് ഒരു ചരിത്ര സിനിമ ചെയ്യുന്നത്. അതും, ഒരു തനി മലയാളി പെണ്‍കൊടിയായി. ഒരുപാട് കാലമായി ഞാന്‍ പ്രതീക്ഷിച്ച വേഷമാണിത്. കളരി അഭ്യാസവും, വാള്‍ പയറ്റും അറിയാവുന്ന ഒരു തന്റേടിയായ പെണ്‍കുട്ടി.’ തനിക്കിതില്‍ അതിയായ സന്തോഷമുണ്ടെന്നും സണ്ണി പറയുന്നു.
