അവസാനം കേരള ബ്ലാസ്റ്റേഴ്സിന് സീസണിലെ ആദ്യ വിജയം
കൊച്ചി : മലയാളി താരങ്ങളുടെ മികവില്‍ കേരള ബ്ലാസ്റ്റേഴ്സിന് സീസണിലെ ആദ്യ വിജയം. കലൂര്‍ സ്‌റ്റേഡിയത്തില്‍ നടന്ന മത്സരത്തില്‍ നോര്‍ത്ത് ഈസ്റ്റ് യുണൈറ്റഡിനെ ഒരൊറ്റ ഗോളിനാണ് ബ്ലാസ്റ്റേഴ്സ് വിജയിച്ചത്. റിനോ ആന്റോയുടെ ക്രോസില്‍ നിന്ന് ഫ്‌ളെയിങ് ഹെഡ്ഡറിലൂടെ വിനീത് വല കുലുക്കുകയായിരുന്നു. പരിക്കേറ്റ സൂപ്പര്‍താരം ബെര്‍ബറ്റോവിന് പകരം വെസ് ബ്രൗണിനെ അണിനിരത്തിയാണ് ബ്ലാസ്റ്റേഴ്സ് കളത്തിലിറങ്ങിയത്. കഴിഞ്ഞ മത്സരത്തില്‍ സസ്‌പെന്‍ഷനിലായിരുന്ന സി.കെ വിനീതും തിരിച്ചുവന്നു.
ആക്രമണങ്ങളും പ്രത്യാകമണങ്ങളും കണ്ട മത്സരത്തിന്റെ 24-ാം മിനിറ്റില്‍ മഞ്ഞപ്പടയുടെ ആരവുമയര്‍ത്തി സി.കെ വിനീത് ഗോള്‍ നേടി. കളിയുടെ ആദ്യ പകുതിയില്‍ ആവേശവും നാടകീയതയും നിറഞ്ഞുനിന്നപ്പോള്‍ രണ്ടാം പകുതി ഇരുടീമിലെയും താരങ്ങള്‍ തമ്മിലുള്ള ഉരസലിനും വേദിയായി. വിജയത്തോടെ അഞ്ചു മത്സരങ്ങളില്‍ നിന്ന് ബ്ലാസ്റ്റേഴ്സിന് ആറു പോയിന്റായി. മൂന്നു സമനിലയും ഒരു തോല്‍വിയും ഒരു വിജയവുമാണ് ബ്ലാസ്‌റ്റേഴേ്‌സിന്റെ ഇപ്പോഴത്തെ നില.
