ജനിക്കുന്നതിനു മുന്‍പ് പെണ്‍കുട്ടികളെ വില്‍ക്കുന്ന സംഘം പിടിയില്‍ ; സഹായത്തിന് ഉന്നത രാഷ്ട്രീയബന്ധങ്ങളും
ഹൈദ്രാബാദ് : ജനിച്ചു വീഴുന്നതിനു മുന്‍പ് ഇന്ത്യയില്‍ പെണ്‍കുട്ടികള്‍ വില്പന ചരക്കാകുന്നു. ദിവസങ്ങള്‍ മാത്രം പ്രായമുള്ള പെണ്‍കുഞ്ഞുങ്ങളെ വാങ്ങി വില്പന നടത്തുന്ന സംഘത്തിനെ എന്‍ഡിടിവി നടത്തിയ അന്വേഷണത്തിനൊടുവിലാണ് കുടുക്കിയത്. എന്‍ഡിടിവി നടത്തിയ സ്റ്റിങ് ഓപ്പറേഷനിലാണ് സംഭവം പുറം ലോകമറിയുന്നത്.രവി എന്നാളെയും കൂടെയുണ്ടായിരുന്ന കൂട്ടാളികളെയുമാണ് ഹൈദരാബാദ് പോലീസ് അറസ്റ്റ് ചെയ്തത്. സ്റ്റിങ് ഓപ്പറേഷന്റെ ഭാഗമായി എന്‍ഡിടിവി സംഘം ഹൈദരാബൈദില്‍ ഓഫീസ് തുടങ്ങുകയും കുട്ടിയെ വാങ്ങാന്‍ തയ്യാറാണെന്ന് അറിയിക്കുകയായിരുന്നു. ഇതിന്റെ അടിസ്ഥാനത്തില്‍ രവിയും അദ്ദേഹത്തിന്റെ ഭാര്യയും കൂടി ഓഫീസില്‍ വരികയും അവരുടെ ഗര്‍ഭസ്ഥ ശിശുവിനെ വില്‍ക്കാന്‍ താത്പര്യപ്പെടുകയുമായിരുന്നു. അള്‍ട്രാസൗണ്ട് സ്കാനിങ്ങിലൂടെ ഉദരത്തിലുള്ളത് പെണ്‍കുട്ടിയാണെന്ന് തിരിച്ചറിഞ്ഞതായും ഒരാഴ്ചയ്ക്കുള്ളില്‍ കുഞ്ഞിനെ നല്‍കാന്‍ കഴിയുമെന്നും രവി വെളിപ്പെടുത്തി. കൂടാതെ തന്റെ സഹോദരിക്ക് മൂന്ന് പെണ്‍കുട്ടികള്‍ ഉണ്ടെന്നും സമ്മതമെങ്കില്‍ അവരെ നല്‍കാമെന്നും രവി പറയുകയും ചെയ്തു.
ഇതിന് ശേഷം ആറ് മാസം കഴിഞ്ഞ് കുട്ടികളെ വില്‍ക്കാനുണ്ടെന്ന് പറഞ്ഞ് രവി വീണ്ടും എന്‍ഡിടിവി സംഘത്തെ സമീപിച്ചു. ഇതോടെ ഇയാള്‍ പെണ്‍കുട്ടികളെ വില്‍ക്കുന്ന സംഘത്തിന്റെ ഇടനിലക്കാരനാണെന്ന് ഉറപ്പായി. ഉയര്‍ന്ന രാഷ്ട്രീയ ബന്ധത്തിന്റെ മറ പറ്റിയാണ് രവിയുടെ ഈ ഇടപാട്. ജനിച്ച്‌ ദിവസങ്ങള്‍ മാത്രം പ്രായമുള്ള പെണ്‍കുഞ്ഞുങ്ങളെയാണ് സംഘം വാങ്ങുന്നത്. അതുപോലെ പെണ്‍കുട്ടിയെ കൊലപ്പെടുത്തിയ കേസില്‍ ഇയാള്‍ ജയിലില്‍ കഴിഞ്ഞിട്ടുണ്ടെന്നും റിപ്പോര്‍ട്ട് ലഭിച്ചിരുന്നു. തുടര്ന്ന് കഴിഞ്ഞ ആഴ്ച രവി ഹൈദരാബാദില്‍ നിന്ന് 80 കിലോമീറ്റര്‍ മാറി സ്വകാര്യ ആശുപത്രിയില്‍ കൊണ്ടുപോകുകയും സ്വന്തം കുട്ടിയാണെന്ന് അവകാശപ്പെട്ട് അഞ്ച് ദിവസം മാത്രം പ്രായമുള്ള കുട്ടിയെ കാണിക്കുകയും വില്‍ക്കാന്‍ ഒരുക്കമാണെന്ന് അറിയിക്കുകയും ചെയ്തിരുന്നു. കുട്ടിയുടെ വിലയായി 80000 രൂപയും കുട്ടി പ്രസവത്തോടെ മരിച്ചു പോയന്ന് റിപ്പോര്‍ട്ട് നല്‍കുന്നതിന് നഴ്സിനും പ്രസവ ശുശ്രൂഷയ്ക്ക് 50,000 രൂപയും നല്‍കണമെന്നും രവി ആവശ്യപ്പെട്ടു. തുടര്ന്ന് രണ്ട് ദിവസത്തിന് ശേഷം ഹൈദരാബാദിലെ ഒരു ക്ഷേത്രത്തില്‍ വെച്ച്‌ കുട്ടിയെ കൈമാറാമെന്ന് രവി അറിയിച്ചു. ഇതിന്റെ അടിസ്ഥാനത്തില്‍ എന്‍ഡിടിവി ന്യൂസ് സംഘം പോലീസിനെ വിവരം അറിയിക്കുകയും കുഞ്ഞിനെ കൈമാറുന്ന ദിവസം പോലീസും സംഘത്തോടൊപ്പം നിലയുറപ്പിക്കുകയും ചെയ്തു.
കൈമാറ്റം നടക്കുന്ന സമയം പോലീസ് സംഘം രവിയെയും അയാളുടെ ഭാര്യയെന്ന് പരിചയപ്പെടുത്തിയ സ്ത്രീയെയും കൂടെയുണ്ടായിരുന്ന മറ്റ് നാല് സഹായികളെയും അറസ്റ്റ് ചെയ്യുകയായിരുന്നു. ഈ സംഘം അടുത്തിടെ ഒരു കുഞ്ഞിനെ കൊല്ലുകയും മൂന്ന് കുട്ടികളെ വില്‍പ്പന നടത്തുകയും ചെയ്തതായി ശിശുക്ഷേമ പ്രവര്‍ത്തകനായ അച്യുത റാവു അറിയിച്ചു. പാവപ്പെട്ടവരില്‍ നിന്നും ആദിവാസികളുടെ പക്കല്‍ നിന്നുമൊക്കെയാണ്‌ ഇവര്‍ പെണ്‍കുട്ടികളെ വാങ്ങുന്നത്. 15000 രൂപ വരെ വാഗ്ദാനം ചെയ്താണ് നിര്‍ധനരായവരില്‍ നിന്നും കുട്ടികളെ വാങ്ങിയ ശേഷം മറിച്ചു വില്‍ക്കുകയാണ് ഈ സംഘത്തിനെ രീതി.
