തോമസ് ചാണ്ടി മനപ്പൂര്‍വമായി ഭൂമി കയ്യേറിയിട്ടില്ല എന്ന് കോടതി
കായല്‍ കയ്യേറ്റ കേസില്‍ മുന്‍ മന്ത്രി തോമസ് ചാണ്ടിക്ക് ആശ്വസിക്കാം. തോമസ് ചാണ്ടി നടത്തിയത് മനപ്പൂർവ്വമുള്ള കയ്യേറ്റമല്ലെന്ന് ഹൈക്കോടതി . കേസില്‍ ഇപ്പോൾ എഫ്ഐആർ രജിസ്റ്റർ ചെയ്യേണ്ട ആവശ്യമില്ല എന്നും കോടതി നിര്‍ദേശിച്ചു. പഞ്ചായത്ത് അംഗം വിനോദും, സിപിഐ നേതാവ് മുകുന്ദനും നല്‍കിയ ഹര്‍ജിയാണ് കോടതി തീര്‍പ്പാക്കിയത്. അതേസമയം അപ്പീലുമായി സുപ്രീംകോടതിയെ സമീപിക്കുമെന്ന് അവര്‍ വ്യക്തമാക്കി. ആലപ്പുഴ ജില്ലാ കളക്ടര്‍ ടി.വി അനുപമയുടെ റിപ്പോര്‍ട്ടില്‍ മാര്‍ത്താണ്ഡം കായലില്‍ തോമസ് ചാണ്ടി കൈയേറിയെന്ന് പറയപ്പെടുന്ന ഭാഗത്ത് വെള്ളം കയറിക്കിടക്കുന്നതിനാല്‍ സര്‍വേ നടത്താന്‍ കഴിഞ്ഞിട്ടില്ലെന്ന് വ്യക്തമാക്കിയിട്ടുണ്ട്.
അടുത്ത മൂന്ന് മാസത്തിനുള്ളില്‍ സര്‍വേ നടപടികള്‍ പൂര്‍ത്തിയാക്കാന്‍ കോടതി നിര്‍ദേശിച്ചു. അതിനു ശേഷം മൂന്നു മാസത്തിനുള്ളില്‍ തോമസ് ചാണ്ടി ഉള്‍പ്പെടെയുള്ള ബന്ധപ്പെട്ട കക്ഷികളുടെ ഭാഗം കേള്‍ക്കണം. തുടര്‍ നടപടികള്‍ സ്വീകരിക്കണമെന്നും കോടതി നിര്‍ദേശം നല്‍കി.
