ആകാശത്ത് നിന്നും ഭൂമിയില്‍ പതിച്ച’അത്ഭുതവസ്തു’ മനുഷ്യവിസര്‍ജ്യമെന്ന് പരിശോധന ഫലം
ഗുഡ്ഗാവ്: ഞായാറാഴ്ച വൈകുന്നേരത്തോടെയാണ് ഗുഡ്ഗാവിന് സമീപമുള്ള ഫാസില്‍പൂര്‍ ഗ്രാമത്തില്‍ വലിയ ശബ്ദത്തോടെ ഒരു വസ്തു വന്നു പതിച്ചത്.ആകാശത്ത് നിന്നും ഭൂമിയില്‍ വന്ന് പതിച്ചത് മിസൈലോ,ബോംബ് ആണോ അതോ ഉല്‍ക്കയാണോ എന്ന് തിരിച്ചറിയാതെ ഗ്രാമവാസികള്‍ നെട്ടോട്ടമായിരുന്നു.അപൂര്‍വ്വ വസ്തു ഭൂമിയില്‍ വന്നു പതിച്ച വാര്‍ത്ത കാട്ടുതീ പോലെ ദേശത്തെങ്ങും പരന്നു. ഇതോടെ ആളുകള്‍ കൂടി.
ആകാശത്ത് നിന്നും ഭൂമിയിലേക്ക് വന്നു പതിച്ച സാധനം എന്താണെന്ന് ഗ്രാമത്തലവനടക്കമുള്ള മുതിര്‍ന്നവര്‍ ചിന്തയിലിട്ട് ചികഞ്ഞപ്പോള്‍ അന്യഗ്രഹജീവികള്‍ തന്ന സമ്മാനമാണെന്ന രീതിയില്‍ കുട്ടികളും ‘അത്ഭുതവസ്തു’വിനു ചുറ്റും കൗതുകത്തോടെ കൂടി.
ആളുകളുടെ പരിഭ്രാന്തി വര്‍ധിച്ചതോടെ ഗ്രാമമുഖ്യനും ജനങ്ങളും ജില്ലാ ഭരണകൂടത്തെ വിവരമറിയിച്ചു. തുടര്‍ന്ന് സംഭവം അന്വേഷിക്കാനായി കാലാവസ്ഥാ നീരിക്ഷണ വകുപ്പിലേയും ദുരന്ത നിവാരണ സംഘത്തിലേയും ഏതാനും അംഗങ്ങളെ ഉള്‍പ്പെടുത്തി ഒരു പരിശോധനാ സംഘത്തെ അധികൃതര്‍ ഗ്രാമത്തിലേക്ക് അയച്ചു. സംഘം ഗ്രാമത്തിലെത്തി ‘അത്ഭുത വസ്തു’വിനെ പരിശോധിച്ച് കാര്യം എന്താണെന്ന് വ്യക്തമാക്കിയതോടെ ഗ്രാമവാസികളുടേയും കുട്ടികളുടേയും പരിഭ്രാന്തിയും അമ്പരപ്പും മാറി.
വിമാനത്തില്‍ നിന്നും താഴെ വീണ വസ്തു മനുഷ്യവിസര്‍ജ്യമാണ്(frozen human waste) എന്നായിരുന്നു പരിശോധന സംഘം കണ്ടെത്തിയത്. അബദ്ധവശാലോ അല്ലാതെയോ വിമാനത്തില്‍ നിന്നും ലീക്ക് ആയതാവാം ഇതെന്നായിരുന്നു പരിശോധനാ സംഘത്തിന്റെ കണ്ടെത്തല്‍.
കൂടുതല്‍ പരിശോധനകള്‍ നടക്കുകയാണെന്നും തിങ്കളാഴ്ചയോടെ വിശദമായ പരിശോധനഫലം പുറത്തുവരുമെന്നും പരിശോധന സംഘത്തെ നയിച്ച കലിയ വ്യക്തമാക്കി.
