അങ്ങനെ പെട്രോള്‍ വില 80 ലെത്തി; മുംബൈയില്‍ പെട്രോള്‍ വില 80 രൂപയിലെത്തി
മുംബൈ:പെട്രോള്‍ വില 2014-ന് ശേഷം ആദ്യമായി 80 രൂപയിലെത്തി.മുംബൈയില്‍ പെട്രോള്‍ ലിറ്ററിന് 80.10 രൂപയും ഡീസലിന് 67.10 മായി.അതേസമയം രാജ്യതലസ്ഥാനമായ ഡല്‍ഹിയില്‍ പെട്രോളിന് വില 72.23 രൂപയാണ്.രാജ്യാന്തര വിപണിയില്‍ അസംസ്‌കൃത എണ്ണയുടെ വില നാള്‍ക്കുനാള്‍ കുത്തനെ വര്‍ധിക്കുകയാണ്.
രാജ്യാന്തര വിപണിയില്‍ ബ്രെന്റ് ക്രൂഡിന് ഇപ്പോഴും ബാരലിന് 68 ഡോളറാണ് വില.വില കുത്തനെ ഉയരുന്ന സാഹചര്യത്തില്‍ അധികം വൈകാതെ കേരളത്തിലും വില 80 ലേക്ക് എത്തിയേക്കും. അടുത്ത ജിഎസ്ടി കൗണ്‍സില്‍ യോഗം പെട്രോളും ഡീസലും ജിഎസ്ടിയുടെ പരിധിയില്‍ ഉള്‍പ്പെടുത്തുന്നത് ചര്‍ച്ചചെയ്യാനിരിക്കെയാണ് വില 80 ലേക്ക് എത്തുന്നത്.
വില കുത്തനേ കൂടുമ്പോഴും നികുതി കുറയ്ക്കുന്ന കാര്യത്തില്‍ തീരുമാനമെടുക്കാതെ കേന്ദ്രവും സംസ്ഥാനങ്ങളും പരസ്പരം പഴിചാരി തടിതപ്പുകയാണ്.ജിഎസ്ടിയുടെ പരിധിയില്‍ പെട്രോള്‍-ഡീസല്‍ വില ചേര്‍ക്കുന്നതിനെ പല സംസ്ഥാനങ്ങളും എതിര്‍ക്കുകയാണ്.
ജി.എസ്.ടി ഏര്‍പ്പെടുത്തുന്നതോടെ പെട്രോളിന്റെയും ഡീസലിന്റെയും വില നിയന്ത്രണവിധേയമാക്കാന്‍ കഴിയുമെന്നാണ് സര്‍ക്കാര്‍ പ്രതീക്ഷിക്കുന്നത്. രാജ്യാന്തര വിപണിയില്‍ വില നിയന്ത്രണാതീതാമയി ഉയരുന്നതിന്റെ പ്രതിഫലനമാണ് ഇന്ത്യന്‍ വിപണിയിലും കാണുന്നതെന്ന് പെട്രോളിയം മന്ത്രി ധര്‍മ്മേന്ദ്ര പ്രദാന്‍ പറഞ്ഞു.
