താലിബാന്‍ നേതാക്കളെ ഉടന്‍ പിടികൂടണമെന്ന് പാകിസ്ഥാനോട് താക്കീതുമായി അമേരിക്ക
വാഷിങ്ടണ്‍: അഫ്ഗാന്‍ അതിര്‍ത്തിയില്‍ തീവ്രവാദപ്രവര്‍ത്തനങ്ങള്‍ നടത്തുന്ന താലിബാന്‍ നേതാക്കളെ ഉടന്‍ പിടികൂടണമെന്ന് പാകിസ്താനോട് അമേരിക്ക.താലീബാന്റെ പ്രവര്‍ത്തനങ്ങള്‍ക്ക് പിന്തുണ നല്‍കുന്നത് പാകിസ്ഥാന്‍ ഉടന്‍ അവസാനിപ്പക്കണമെന്നും അമേരിക്ക താക്കീത് നല്‍കി.കാബൂളിലെ ഇന്റര്‍ കോണ്ടിനെറ്റല്‍ ഹോട്ടലില്‍ കഴിഞ്ഞ ദിവസം ഉണ്ടായ ഭീകരാക്രമണത്തിന് പിന്നലെയാണ് വൈറ്റ്ഹൗസ് പ്രസ്താവന ഇറക്കിയത്. ആക്രമണത്തില്‍ 22 പേര്‍ കൊല്ലപ്പെട്ടിരുന്നു.
താലിബാന്‍ നേതാക്കളെ ഉടന്‍ പിടികൂടുകയോ പുറത്താക്കുകയോ ചെയ്യണമെന്ന് തങ്ങള്‍ പാകിസ്താനോട് ആവശ്യപ്പെട്ടിട്ടുണ്ട്. പാക് മണ്ണില്‍ അവരുടെ പ്രവര്‍ത്തനങ്ങള്‍ പിന്തുണ നല്‍കുന്നതിന് പകരം തടയുകയാണ് വേണ്ടെതെന്നും വൈറ്റ് ഹൗസ് പ്രസ് സെക്രട്ടറി സാറാ സാന്‍ഡേഴ്‌സ് വാര്‍ത്താസമ്മേളനത്തില്‍ അറിയിച്ചു.
ആക്രമണത്തില്‍ ഫലപ്രദവും വേഗത്തിലുള്ളതുമായ പ്രവര്‍ത്തനങ്ങള്‍ സ്വീകരിച്ച അഫ്ഗാന്‍ സുരക്ഷാ സേനയെ അഭിനന്ദിക്കുന്നു.തീവ്രവാദത്തെ ചെറുക്കുന്നതിന് അഫ്ഗാന്‍ സൈന്യത്തിന് പൂര്‍ണ്ണ പിന്തുണ നല്‍കും. ശത്രുക്കളെ തുടച്ച് നീക്കുന്നത് വരെ പോരാട്ടം തുടരും. ലോകത്തേക്ക് ഭീകരവാദം കയറ്റി അയക്കുകയാണ് താലിബാനെന്നും സാന്‍ഡേസ് കൂട്ടിച്ചേര്‍ത്തു.
