പേഴ്‌സ് അടിച്ചുമാറ്റി ബൈക്കില്‍ മുങ്ങിയ കള്ളന്മാരെ ഓടിച്ചിട്ട് പിടിച്ച് കൈകാര്യം ചെയ്യുന്ന യുവതി- വീഡിയോ വൈറല്‍
റാവല്‍പിണ്ടി: റോഡിലൂടെ നടന്നു പോകവെ കൈയിലുള്ള ബാഗോ പഴ്‌സോ മോഷ്ടാക്കള്‍ തട്ടിയെടുത്താല്‍ ആദ്യം നാം ചെയ്യുക കരഞ്ഞ് നിലവിളിച്ച് ആളെകൂട്ടുകയാവും.ആളൊക്കെ ഓടി കൂടുമ്പോഴേക്കും മോഷ്ടാക്കള്‍ രക്ഷപ്പെട്ടിരിക്കും.എന്നാല്‍ ഇവിടെ ബൈക്കിലെത്തി പഴ്‌സ് കവരാന്‍ ശ്രമിച്ച മോഷ്ടാക്കളെ ഓടിച്ചിട്ട് പിടിച്ച് നല്ലോണം പെരുമാറിയ പാക് യുവതിയാണ് ഇപ്പോള്‍ സോഷ്യല്‍ മീഡിയയില്‍ താരം.
റാവല്‍പിണ്ടിയില്‍വച്ചായിരുന്നു സംഭവം. റോഡിനു സമീപത്തു കൂടി നടന്നുവരികയായിരുന്ന യുവതിയുടെ സമീപമെത്തിയ മോഷ്ടാക്കള്‍ ബാഗ് വലിച്ചെടുത്തുകൊണ്ടുപോയി. ഇതിനിടയില്‍ ബാലന്‍സ് തെറ്റി ബൈക്ക് മറിയുകയും യുവാക്കള്‍ താഴെ വീഴുകയും ചെയ്തു.
ഉടന്‍തന്നെ ഓടി മോഷ്ടാക്കളുടെ അടുത്ത് എത്തിയ യുവതി രണ്ടുപേരെയും നടുറോഡിലിട്ട് തല്ലി. ഇതിനിടെ മോഷ്ടാക്കളില്‍ ഒരാള്‍ ഓടി രക്ഷപ്പെട്ടു. രണ്ടാമത്തെയാളെ യുവതി പിടികൂടി വീണ്ടും വീണ്ടും തല്ലി. അതുവഴി ബൈക്കിലെത്തിയ മറ്റൊരാള്‍ യുവതിയെ തടയാന്‍ ശ്രമിച്ചെങ്കിലും ഫലമുണ്ടായില്ല.
എന്തായാലും തന്റെ കൈയ്യുടെ ചൂട് മോഷ്ടാവിനെ ശരിക്ക് അറിയിച്ചിട്ടാണ് യുവതി സ്ഥലം വിട്ടത്. 39 സെക്കന്റ് ദൈര്‍ഘ്യമുളള സംഭവത്തിന്റെ വീഡിയോ സോഷ്യല്‍ മീഡിയയില്‍ വൈറലാവുകയാണ്.വീഡിയോ കണ്ട ചിലര്‍ ‘ഝാന്‍സി കി റാണി’ എന്നാണ് യുവതിയെ വിളിച്ചിരിക്കുന്നത്.
