ബ്ലാസ്റ്റേഴ്സിന്റെ പുതിയ താരമെത്തി ; ഇനിയെങ്കിലും റൈറ്റ് ട്രാക്കിലാകുമോ കേരളം
ഐഎസ്എല്ലില്‍ സെമി ലൈനുറപ്പാക്കാന്‍ പൊരുതുന്ന ബ്ലാസ്റ്റേഴ്സിലേക്ക് പുതിയൊരു വിദേശ താരം കൂടി.മുന്നേറ്റ താരം സിഫ്നിയോസ് പിന്മാറിയ ഒഴിവിലേക്ക് ഐസ്‌ലാന്‍ഡില്‍ നിന്നുള്ള ഗുഡോണ്‍ ബാല്‍ഡ്‌വിന്‍സണെയാണ് ബ്ലാസ്റ്റേഴ്സ് പകരക്കാരനായി എത്തിച്ചിരിക്കുന്നത്.സ്റ്റജാര്‍നന്‍ എഫ് സിയില്‍ നിന്ന് ലോണിലാണ് താരം ബ്ലാസ്റ്റേഴ്‌സില്‍ എത്തിയിരിക്കുന്നത്. ബ്ലാസ്റ്റേഴ്സ് റിലീസ് ചെയ്ത സിഫ്‌നിയോസിനെ എഫ് സി ഗോവ ദിവസം ടീമിലെത്തിച്ച ദിവസം തന്നെയാണ് ഗുഡൊണേ ബ്ലാസ്റ്റേഴ്സ് തങ്ങളുടെ പാളയത്തിലെത്തിച്ചിരിക്കുന്നത്.
31 വയസ്സുകാരനായ ഗുഡോണ്‍ 2009-ല്‍ ദേശീയ ടീമിനു വേണ്ടിയും കളിച്ചിട്ടുണ്ട്. സീസണ്‍ അവസാനം വരെ താരം ബ്ലാസ്റ്റേഴ്‌സില്‍ തുടരുമെന്നാണ് അറിയുന്നത്. ഡേവിഡ് ജെയിംസിന്റെ അസിസ്റ്റന്റ് കോച്ചാണ് കരാറിനു പിന്നിലെ ചരട് വലിച്ചതെന്നാണ് അറിയുവാന്‍ കഴിയുന്നത്. പെപ്‌സി ലീഗില്‍ താരം ഇതുവരെ 19 മത്സരങ്ങളില്‍ നിന്നായി 12 ഗോളുകള്‍ നേടിയിട്ടുണ്ട്.ഇതുവരെ ആരാധകരുടെ പ്രതീക്ഷയ്ക്ക് ഒപ്പമെത്താന്‍ കഴിയാതെ പോയ കേരള ബ്ലാസ്റ്റേഴ്‌സിനു താരത്തിന്റെ വരവ് നല്‍കുന്ന ഊര്‍ജ്ജം ശേഷിക്കുന്ന മത്സരങ്ങളില്‍ ടീമിനെ വിജയ വഴിയിലെത്തിക്കുമെന്ന പ്രതീക്ഷയിലാണ് മഞ്ഞപ്പടയും മറ്റു ആരാധക വൃന്ദങ്ങളും.
