ബ്ലാസ്റ്റേഴ്സിന്റെ ദീപേന്ദ്ര നേഗിയുടെ വണ്ടര്‍ ഗോള്‍ മികച്ച ഗോളിനായുള്ള മത്സരത്തിലും സൂപ്പര്‍ വണ്ടര്‍;വോട്ടെടുപ്പില്‍ നേഗി ബഹുദൂരം മുന്നില്‍;വോട്ടിങ് തുടരുന്നു
ഐ.എസ്.എല്ലിലെ പോയ വാരത്തെ മികച്ച ഗോള്‍ തിരഞ്ഞെടുക്കാനുള്ള പട്ടികയില്‍ കേരള ബ്ലാസ്റ്റേഴ്സിന്റെ പുതിയ താരോദയം ദീപേന്ദ്ര നേഗിയുടെ ഗോളും. ഡല്‍ഹി ഡൈനാമോസിനെതിരെ തോല്‍വി മുന്നില്‍ക്കണ്ട് നില്‍ക്കെ ദീപേന്ദ്ര നേടിയ സമനില ഗോളാണ് പട്ടികയില്‍ ഇടം പിടിച്ചിരിക്കുന്നത്. ഐ.എസ്.എല്ലില്‍ അരങ്ങേറി തന്റെ ആദ്യ ടച്ചില്‍ തന്നെ നേഗി ഗോള്‍ നേടിയിരുന്നു.
രണ്ടാം പകുതിയില്‍ കേരള ബ്ലാസ്റ്റേഴ്സ് ഒരു ഗോളിന് പിറകില്‍ നില്‍ക്കുമ്പോഴാണ് പകരക്കാരനായി ഇറങ്ങിയ നേഗി ഗോള്‍ നേടി മത്സരം സമനിലയിലാക്കിയത്. ജാക്കിചാന്ദ് സിംഗിന്റെ കോര്‍ണറില്‍ നിന്നായിരുന്നു നേഗിയുടെ ഗോള്‍ പിറന്നത്. തുടര്‍ന്ന് മത്സരം ജയിപ്പിച്ച ഇയാന്‍ ഹ്യൂമിന്റെ ഗോള്‍ ഒരുക്കിയതും നേഗി ആയിരുന്നു. ഡല്‍ഹി പ്രതിരോധ നിറയെ കബളിപ്പിച്ച് മുന്നേറിയ നേഗിയെ പെനാല്‍റ്റി ബോക്‌സില്‍ ഫൗള്‍ ചെയ്തതിനു ലഭിച്ച പെനാല്‍റ്റി വലക്കുള്ളിലാക്കിയാണ് ഇയാന്‍ ഹ്യൂം കേരള ബ്ലാസ്റ്റേഴ്‌സിന് വിജയം നേടി കൊടുത്തത്. മത്സരത്തില്‍ ഹീറോ ഓഫ് ദി മാച്ച് ആയും നേഗി തെരഞ്ഞെടുക്കപ്പെട്ടിരുന്നു.
എഫ്.സി ഗോവയുടെ ഫെറാന്‍ കോറോമിനാസ്, ബെംഗളൂരു എഫ്.സിയുടെ സുനില്‍ ഛേത്രി, പൂനെ സിറ്റിയുടെ എമിലാനോ അല്‍ഫാറോ, ബെംഗളൂരു എഫ്.സിയുടെ തന്നെ ജുവാനന്‍ എന്നിവരാണ് നേഗിയെ കൂടാതെ പട്ടികയില്‍ ഇടം പിടിച്ച കളിക്കാര്‍.ഇതുവരെയുള്ള വോട്ടെടുപ്പില്‍ 94.8 ശതമാനം വോട്ടും നേടി നേഗി തന്നെയാണ് ഒന്നാം സ്ഥാനത്തുള്ളത്.
വോട്ട് ചെയ്യാനുള്ള ലിങ്ക്:https://www.indiansuperleague.com/goal-of-the-week#_=_
