ചാംപ്യന്‍സ് ലീഗില്‍ ഇന്ന് പൊടിപാറും പോരാട്ടം; നെയ്മര്‍- റൊണാള്‍ഡോ പോരില്‍ ജയം ആര്‍ക്കൊപ്പം
ചാമ്പ്യന്‍സ് ലീഗില്‍ ഇന്ന് ആവേശ മത്സരം. ലോകത്തെ ഏറ്റവും മികച്ച ഫുട്ബോള്‍ മാമാങ്കത്തിന്റെ അവസാന പതിനാറില്‍ ഇന്ന് സ്പാനിഷ് വമ്പന്മാരും നിലവിലെ ചാംപ്യന്മാരുമായ റയല്‍ മാഡ്രിഡ് ഫ്രഞ്ച് കരുത്തന്മാരായ പിഎസിജിയെ നേരിടും. ഇന്ത്യന്‍ സമയം രാത്രി 1.15നാണ് മത്സരം.ലോകത്തിലെ രണ്ട് സൂപ്പര്‍ താരങ്ങളായ പോര്‍ച്ചുഗലിന്റെ ക്രിസ്റ്റിയാനോ റൊണാള്‍ഡോയും ബ്രസീല്‍ താരം നെയ്മറും നേര്‍ക്കുനേര്‍ വരുന്ന പോരാട്ടത്തില്‍ തീപാറുമെന്നുറപ്പ്.
തുടര്‍ച്ചയായ മൂന്നാം ചാംപ്യന്‍സ് ലീഗ് കിരീടം ലക്ഷ്യമിടുന്ന റയല്‍ മാഡ്രിഡിന്റെ സ്വന്തം തട്ടകമായ സാന്റിയാഗോ ബെര്‍ണാബുവിലാണ് ആദ്യ പാദം. രണ്ടാം പാദം പിഎസ്ജിയുടെ മൈതനാമായ പാര്‍ക്ക് ഡെ പ്രിന്‍സിലും നടക്കും.
സ്പാനിഷ് ലീഗില്‍ പതര്‍ച്ച തുടരുന്ന റയല്‍ മാഡ്രിഡിന് ഈ സീസണില്‍ ലീഗ് കിരീടത്തില്‍ കാര്യമായ പ്രതീക്ഷയില്ല. അതുകൊണ്ടുതന്നെ, ചാംപ്യന്‍സ് ലീഗ് കിരീടമാണ് ഇനിയുള്ള പ്രതീക്ഷ. അതേസമയം, ലോക റെക്കോര്‍ഡ് തുകയ്ക്ക് ബാഴ്സയില്‍ നിന്നും പിഎസ്ജിയിലെത്തിയ നെയ്മറിന് കിരീടത്തില്‍കുറഞ്ഞൊന്നും തന്റെ ക്ലബ്ബിനു നല്കാനില്ല. നെയ്മര്‍, കവാനി, എംബപ്പെ എന്ന ലോകോത്തര മുന്നേറ്റനിരയെ നേരിടാന്‍ സിദാന്‍ എന്ത് അത്ഭുതമായിരിക്കും ഒരുക്കിയിരിക്കുക എന്നതാണ് ഫുട്ബോള്‍ ലോകം ഉറ്റുനോക്കുന്നത്.
